һәр аңлишиңиз дилиңизға һозур, вәтәнни сеғинған сәрсан йүрикиңизгә дава болғуси
йеңи зеландийәниң «Planet FM», йәни «планета ф м» радийо истансиси көп хил мәдәнийәт, етиқад, көз-қараш вә турмушни асас қилған һалда инглиз тилини өз ичигә алған 30 нәччә хил тилда аңлитиш бериду.
йеқинда иҗтимаий алақә мунбәрлиридин фәйсбок, йутубе қатарлиқларда 2020-йили 11-нойабирдин башлап, мәзкур радийо истансисида «үнчә радийо программиси» намида уйғурчә аңлитиш берилидиғанлиқи елан қилинди.
йеңи зеландийәдики ризвангүл нурмуһәммәт ханим йеңи зеландийә «планета ф м» радийо истансисиниң уйғурчә аңлитишиниң мәсул хадимидур. ризвангүл ханим 10-нойабир әркин асийа радийоси уйғур бөлүминиң зийаритини қобул қилип, йеңи зеландийә «планета» радийосиниң уйғурчә аңлитиши һәққидә мәлумат бәрди.
ризвангүл ханимниң билдүрүшичә, 2020-йили 9-айниң ахирида йеңи зеландийә «планета ф м» радийосида уйғур тилида аңлитиш тәстиқланған. әйни чағда йәнә мәзкур радийониң уйғур тилидики аңлитишидин йерим йилғичә һәқ алмаслиқ етибариму берилгән.
униң билдүрүшичә, йеңи зеландийә «планета ф м» радийосиниң уйғурчә «үнчә радийо программиси» һәр икки һәптидә бир қетим, чаршәнбә күни йеңи зеландийә вақти чүштин кейин саәт 3:20 дә, йерим саәт аңлитилидикән. программида «мирас», «йеңи һайат», «тарим ғунчилири» сәһипилири тәсис қилинған. программа уйғур мәдәнийити, тарихи, өрп-адәтлири, әдәбийати вә уйғур тилини җанландурушни нишан қилған.
уйғур аңлитиш, «планета ф м 104. 6» радийо частотиси вә «планета ф м 104. 6» радийо тор бети арқилиқ аңлитиш бериду.
мәзкур программа йәнә иҗтимаий таратқулардин йутубе қанилидиму ечилған болуп, йәнә «вуййу медиа» қанили арқилиқму тәкрар берилидикән.
йеңи зилландийәдин аңлитиливатқан үнчә программиси 1- сан
ризвангүл нурмуһәммәт ханимниң билдүрүшичә, һазирчә «үнчә радийо программиси» йеңи зеландийә, австралийә, америка қатарлиқ дөләтләрдики 7 нәпәр уйғурниң халисанә пидакарлиқи билән аңлитишни башлиған.
«үнчә радийо программиси» ниң австралийәдики мухбири рәна ғопур ханимму 10-нойабир радийомиз зийаритини қобул қилип, мәзкур радийониң уйғурчә аңлитишиниң мәзмунлири һәққидә мәлумат бәрди.
рәна ханимниң билдүрүшичә, уйғур тилидики «үнчә радийо программиси» уйғур мәдәнийити, тарихи, өрп-адәтлири, уйғур тил әдәбийати вә муһаҗирәттә мувәппәқийәт қазанған уйғурларни тонуштуруш қатарлиқ уйғурларға илһам беридиған мәзмунларда программа беришни асас қилидикән.
хәвәр мәнбәси: әркин асийа радийоси