уйғур тарихидики доппа әң йарашқан уйғур даһийси әхмәтҗан қасимидур! уйғур тарихидики һечқачан вә һәр күни, һәр вақит бешидин допписини чүшүрмигән даһий пәқәт әхмәтҗан қасимидур!
әхмәтҗан қасими һечқачан допписини рәсмийәт үчүн кийип қойған әмәс!
доппа, бурут вә сақал уйғур әрликиниң символи болса, 35 йешида шеһит болған әхмәтҗан қасими әнә шу доппа билән бурутни әрләрниң әрлик гүзәллики дәп өзигә муҗәссим қилған даһийдур!
һәқиқий уйғур оғли әхмәтҗан қасими әнә шу допписи билән хитай түрмисидә йатқан, допписи билән җәңгә атланған, допписи билән 9 маддилиқ шәрқий түркистан мустәқиллиқ хитабнамисини йазған, әнә шу допписи билән шәрқий түркистан армийәсиниң үч фронт уруш пиланини түзгән, әнә шу допписи билән җаң җиҗоңдәк хитай мустәмликичилири билән кәскин талаш-тартиш қилип, хитайниң дипломатийә түлкиси дәп нам алған мәзкур җаң җиҗоңни зар-зар қақшитип, «болди, мән саңа тәң келәлмидим, сән билән талаш-тартиш қилалиғудәк башқа бирини әвәтәй» дегүзгән, әнә шу допписи билән хитай һөкүмранлиқидики ақсу, қәшқәр, хотәнләрни кезип хәлқни тәврәткән, қәшқәр хәлқини йеңишәһәрдин конашәһәргичә 10 километир йол үстидә «йашисун әхмәтҗан!» дәп қарши алдуралиған, турпан хәлқини өзи олтурған машиниси билән тәң көтүрүп маңидиған дәриҗидә һайаҗанландуралиған, үрүмчидики 10 миңлиған хитай намайишчиларни өзигә қарши қозғийалиған һәм улар «әхмәтҗанни өлтүрәйли, әхмәт йоқалсун!» дәп намайиш қилип алдиға етилип кәлгәндә әнә шу допписини кийгән һалда җаллатларниң алдида мәйдисини тик тутуп, уларни мәғлуп қилип қуйруқини хада қилдуралиған, әнә шу допписи билән нәнҗиңдики хитай қурултийида җаң кәйшини сарасимигә салалиған, нәнҗиң, бейҗиң, шаңхәй вә башқа шәһәрләрдә уйғурларни «йавайилар »дәп көзгә илмиған хитай генераллири, йавропалашқан хитай буржуазийә ақсөңәклирини«немә дегән қамлашқан, келишкән вә әқиллиқ уйғур, шуңа бизниң армийәмизни мәғлуп қилалиғанкән-дә ?»дегүзүп,қайиллиқ ичидә баш егип салам қилишқа мәҗбур қилалиғаниди.
уйғур даһийси әхмәтҗан қасими әнә шу допписи билән көкрикидики уйғур мустәқиллиқиниң символи болған әң алий орден- шәрқий түркистан азадлиқ алтун ордени тақалған йаришимлиқ, чирайлиқ, һәр вақит пакиз кастийом-бурулкилири билән үрүмчидики америка, әнглийә консуллири вә мухбирлирини һәйранлиқ ичидә өзигә җәлп қилалиса, буниңға чоңқур вә кәң билим сапаси, күчлүк әқлий иқтидари, кәскин вә йол қоймас характерини қошуп, соң шиләндәк, « силәрни һәр вақит қириветәләймән, бизниң 400 милйон адимимиз вә 8 милйон армийәмиз, заманиви қораллиримиз бар, силәр аранла 3 милйон» дәп һәйвә қилидиған хитай генераллирини вә әшәддий милләтчи әмәлдарлирини өзи алдида шүмшәйтип һәйвисини сундуралиғаниди.
әхмәтҗан қасими әнә шу допписи, әнә шу азадлиқи ордеени, мәртлики,билими, әнә шу милләтпәрвәр вә хәлқпәрвәрлики, қисқиси милләт йолидики қолидин кәлгән һәммә һәрикәтлири билән уйғур хәлқиниң дүшмәнлири, өзини көрәлмәс һәсәтхорлар, хаинлар, җаллатлар вә ғалчилар, болупму у даим сөз нутуқлири вә мақалилиридә һәтта йүзмуйүз туруп тилға алидиған «хитай мустәмликичилири» тәрипидин наһайити өч көрүлгән, тилланған вә һақарәтләнгәниди.
уйғур даһийси әхмәтҗан ахирида әнә шу допписи билән мәйдисидики мустәқиллиқ символи аййултузлуқ азадлиқ орденини тақиған һалда сталин-мав достлуқиниң қурбани, йәни шеһитлик йолини таллидики, бейҗиңға берип, мав зедоңға доппа вә тон кийдүрүш йолини таллимиди!
уйғур хәлқи тәрипидин һазирғичә болған бир әсирдин артуқ вақит ичидә « сөйүмлүк рәһбиримиз» дегән әң шәрәплик намға еришәлигән бирдинбир уйғур даһийси әхмәтҗан қасими әнә шу допписи, әнә шу гүзәл әрлик бурути, әнә шу шәрқий түркистан мустәқиллиқ ордени билән өз хәлқиниң әркинлики, азадлиқи, дини вә мустәқиллиқи йолидин ваз кәчмәй, уйғур хәлқигә пайдисиз вә зийанлиқ болған әң мурәккәп хәлқаралиқ вәзийәт вә хәлқаралиқ дүшмәнлик арисидин чиқиш йоли издәп ахири өз ғайиси йолида йоқ болди! у, қолидин кәлгәнниң һәммисини қилип, әнә шу допписи вә азадлиқ орденини тақиған һалда шеһит болди! униң допписи, униң мустәқиллиқ орденилиқ чапини униң кепини болғаниди !
лекин, у бир бәндә болғанлиқи үчүн хатасиз әмәс иди! йүздәйүз мукәммәл инсан болмиғандәк уму шундақ инсанларниң бири иди, гунаһини аллаһ өзи кәчүргәй !
2023-йили 5-май
