йапонийәдә бу йил 4-айда парламент әзаси болуп сайланған уйғур қизи арфийә хәлқарадики нопузлуқ журнал болған «дәвр» журнилиниң 2023-йиллиқ «кәлгүсигә тәсир көрситидиған 100 шәхс» (TIME100 Next) тизимликидин орун алған.
бу тизимлик сағламлиқ, килимат, сода, тәнтәрбийә, сәнәт вә башқа җәһәтләрдә қәд көтүрүватқан шәхсләрни тәқдирләшни мәқсәт қилған болуп, униңға җәмийәттики әң җиддий мәсилиләрни йеңи һәл қилиш чариси билән тәминлигән алимлар, сийасәтчиләр, баш иҗраийә әмәлдарлири, сәнәткарлар, аләм учқучилири, кутупхана хизмәтчиси қатарлиқ һәрсаһәдин шәхсләр киргүзүлгәникән.
«дәвр» журнили арфийәниң бу тизимликкә киргүзүлүшиниң сәвәби һәққидә тохталғанда бу йил 4-айда йапонийә парламент әзалиқиға сайланған арфийәниң йапонийә сийасәт саһәсидики «йашанған әрләрниң һакимийити» гә риқабәт елан қилғанлиқини әскәрткән. униңда мундақ дейилгән:
«йапонийәдә тәхминән 90% парламент йаки министирлиқ вәзиписини әрләр игилигән. парламент әзалириниң оттуричә йеши 56 йаш. . . әмма уйғур вә өзбек әслидин болған, 34 йашлиқ арфийә ери. . . . йапонийәдики көп хиллиқниң чемпийониға айланди»
«дәвр» журнили тонуштурушида йәнә, арфийәниң дөләтни башқуруватқан «йашанған әрләр кулуби» гә тәһдит болуш әмәс, бәлки улар билән һәмкарлиқ орнитиш асасида һакимийәт бешидики либерал демократлар партийәси ичидә сийасәт қиливатқанлиқини йазған. арфийәниң йәнә баш министир фумио кишиданиң нурғун сийасәтлирини қоллаватқанлиқини, униң йапонийәниң даңлиқ сийасәтчилиридин болған санлиқ мәлумат ишлири министири таро конониң қоллишиға еришкәнликини байан қилип: «арфийә ери дөләтниң һәқиқий көп хиллиқини йахши намайан қилиш үчүн өзини көврүк қилип тиклиди». дегән.
уйғур қизи арфийә бу йил 4-айда йапонийә парламент әзалиқиға сайланғанда хәлқаралиқ ахбаратларниң күчлүк диққитигә еришкән. арфийә әйни чағда аксйос (Axios) ториниң зийаритини қобул қилғанда уйғурларниң бешиға келиватқан күлпәтни әслитип туруп «уйғурлар һазир ирқий қирғинчилиқниң қурбани болуватқан бир милләт болсиму, униң худди башқа милләтләргә охшаш қәд көтүрүп гүллинишкә лайиқ бир хәлқ икәнликини, буни өз хизмити арқилиқ намайан қилип беришни үмид қилидиғанлиқини» билдүргәниди.
