иҗтимаий таратқуларниң тузақлириға чүшүп кәтмәң!

фейсбук, инистаграм, тиветтер қатарлиқ иҗтимаий таратқуларда тарқитилидиған нәрсиләрниң һәммисиниң әң аз дегәндә бирәрдин ғәризи вә мәқсити бар. бәзиси йахшилиқни тарқитип саваб тепишни халайду, бундақ кишиләргә мубарәк болсун. бәзиси өзини мәшһур қилишни халайду, бәзиси питнә- пасат теришни халайду, бәзиси иқтидарлиқ кишиләргә болған һәсәтни обзор, тәнқид, түзитиш дегәндәк исимлар билән пәрдә арқисида йошурунуп туруп ипадиләйду, чүнки улар дадиси қойған исим билән оттуриға чиқишқа җүрәт қилалмайдиған дәриҗидә намәрд вә қорқунҗақ мәхлуқлардур. бәзиси змзәм қудуқиға сийгән әрәбкә охшаш хәлқ мени тиллисиму намим чиқсун дәп иш көриду, бәзиси уйғурлар үчүн хизмәт қиливатқан тәшкилат вә җәмийәтләрни, шундақла муһим шәхсләрни етибасизлаштуруш үчүн хоҗайинлириниң көрсәтмиси бойичә бузғунчилиқ қилиду, бәзиси ким көп йүрәк бәрсә мәнму әл қатаридин қелип қалмай дәп өзи оқуп йаки аңлап бақмиға йаки чүшәнмигән нәрсиләргә йүрәк бериду. буларниң һечқайсиси қилмишлирини икки пәриштиниң йезип туридиғанлиқидин һеч әнсиримәйду. чүнки, улар аллаһтин қорқмайду. әмди қандақ қилиш керәк?

1, чивиндәк пакиз вә паскина нәрсиләрниң һәммисигә қонмай, һәсәл һәрисидәк пакиз, хушпурақ нәрсиләргә қонуң. мәйли тарқитиң йаки йүрәк бериң, бу қилғинимни аллаһ йахши көрәмду вә хәлқимгә пайдилиқму дегәнни обдан ойлап иш күрүң.

2. немини тарқитиң вә немигә йүрәк бериң, аллаһниң алдида чоқум һесаб беридиғанлиқиңизни унтуп қалмаң. чүнки қийамәт күни ашу бармақлириңиз сизгә қарши гуваһлиқ бериду.

3. бармақлириңизниң сизни йа аллаһниң рәһмитигә вә мәғпиритгә йаки униң ғәзипигә вә җазасиға елип бариғанлиқини обдан ойлап иш көрүң.

4. биравниң абруйини чүшүргән йаки тиллиған нәрсиләрни тақитип йаки йүрәк берип, ғәйвәткә вә төһмәткә шерик болуп қалмаң, чүнки у чағда ибадәтлиңиз сизни аллаһниң җазасидин қутқузалмайду.

5. иҗтимаий таратқуларда сөзлигән йаки йазған кишиләрни йетәрлик тонумисиңиз йаки көрүб бақмиған болсиңиз ишинип кәтмәң. чүнки, дүшмән сизни қайил қилидиған қәһриманларни ишләпчиқирип туриду. мундақла сизни тәнқидлигән йаки сизгә қаритип обзор йазған болсиму, униңға һеч әһмийәт бәрмәң. шундақ қилсиңиз улар базар тапалмайду. улар бу аләмдә сизгә һәқиқий йүзини көрситәлмигәндәк, қийамәт күни аллаһниң алдиғиму йүзи йоқ чиқиду.

6. диний мәсилиләрдә теги- тәкти билинмигән йаки дадиси әзан чақирип қойған исми билән оттуриға чиқалмайдиған йаки йеңидин тор дунйасиға пәйда болуп қалған әлламиләргә ишинип кәтмәң. чүнки, өзиниң исмиға ишәнмигән адәмгә сиз қандақ ишинисиз? унтумаңки, өтмүшләрдә әҗдадимиз бундақларниң дәрдини көп тартқан. сиз һәргиз тақма исим қолланмаң, чүнки, исмиңизни йошурған билән, қилмишиңизни аллаһтин йошуралмайсиләр. инсалар сизни әдәплийәлмигән билән, аллаһ җазалийалайду. (сийасий җәһәттин өзриси бар кишиләр буниңдин мустәсна).

7. иҗтимаий таратқуларни қоллинишқа чәк қойуң. чүнки һәрбир вақтиңиз өмриңизниң бир парчисидур. қийамәт күни аввал өмүрни немигә сәрп қилғанлиқтин сорилиду. шуңа аллаһқа һесаб берәлмәйдиған, виҗданиңизға җаваб берәлмәйдиған ишни қилиштин һәзәр әйләң. һайатта мәшһур болуш үчүн әмәс, муһим адәм болуш үчүн тиришиң. чүнки, тилларда дастан болған пәйғәмбәрләр вә үлгилик затлар һәммиси муһим кишиләр иди. ахирда шуни қәтий унтумаңки, ентрнет сизниң йахши йолларға қоллинишиңиз үчүн ата қилинған бир немәт. шуңа уни өзиңизниң вә хәлқиңизниң пайдиси үчүн ишлитиңки, кишиләрни аздуруш йаки биравларниң әйбини издәп аллаһқа йүз келәлмәйдиған чоң гунаһларни садир қилиштин сақлиниң. чүнки аллаһ бәндилириниң әйиблирини йөгәп турса, сиз ачимән десиңиз, униңға җәң елан қилған болисиз. бу җәңдә йеңип чиқаламсиз? пирәвнму йеңәлмигән, ад вә сәмудқа охшиған күчлүк қәвмләрму йеңилгән. шәксизки, аллаһ өзиниң һәққидин өтиду, әмма бәндилириниң һәқлиридин өтмәйду.