аталмиш уйғур аптоном районлуқ һөкүмәтниң рәиси әркин тунийаз 2-април қирғизистан президенти садир җапароф билән көрүшкән. бу униң оттура асийа сәпириниң қазақистан вә өзбәкистандин кейинки үчинчи бекити. икки тәрәп арисида сода һәмкарлиқини күчәйтиш вә қирғизистан билән қәшқәр арисида авиатсийә линийси ечиш қатарлиқ темилар музакирә қилинған. 

оттура асийа вақти ториниң хәвәр қилишичә, икки тәрәп оттурисида, 50 дин артуқ хитай ширкитиниң сода вәкиллириниң иштирак қилиши билән рәқәмләштүрүш, қатнаш, әшйа обороти, мәбләғ селиш, деһқанчилиқ вә инсанпәрвәрлик түрлири тоғрисидики тәклипләр музакирә қилинған.

қирғизистан президенти җапароф хитайниң өз дөлитиниң асаслиқ сода вә мәбләғ селиш шериклириниң бири икәнликини байан қилип, хитай-қирғизистан-өзбекистан төмүр йоли қурулушиниң мувәппәқийәтлик илгирилигәнликини тилға алған.

икки тәрәп йәнә, аз учрайдиған металлар саһәсидики һәмкарлиқларни вә қирғизистанниң ош шәһири билән қәшқәр шәһири арисида авиатсийә линийиси ечиш мәсилисини музакирә қилған.

әркин тунийаз йәнә қирғизистан министирлар кабинетиниң рәиси ақилбәк җапароф билән көрүшкән. у: «сода вә иқтисадий һәмкарлиқта биз шинҗаңға тайинимиз. хитайниң бу райони биз үчүн дөлитиңларға ечилған бир хил дәрваза » дегән.

хитайниң статистикисиға қариғанда, 2023-йили икки дөләт оттурисидики сода обороти 19 милйард 800 милйон доллар болған болуп, 2022-йилидин буйан% 30 ашқан.

хитайниң шәрқий түркистандики ирқий қирғинчилиқи давамлишиватқан бир пәйттә, оттура асийа дөләт башлиқлириниң хитай зийаритиидә уйғур дийарида тохтап өтүши, шундақла әркин тунийазниң хитайға вакалитән оттура асийа дөләтлиридә зийарәттә болуши диққәт тартмақта. 

2024-йили 2-април