тәйвәндә 25 йилдин буйанқи әң күчлүк йәр тәврәш йүз бәргәндин кейин, һөкүмәт хитайниң йардәм тәклипини рәт қилди, шундақла хитайни пурсәтпәрәслик вә номуссизлиқ қилиш билән әйиблиди.

3-апрел чаршәнбә күни сәһәрдә, тәйвәнниң шәрқидики хулиән шәһиридә 7.4 бал йәр тәвриди. бу тәйвәндә 1999-йилидин буйанқи әң чоң йәр тәврәш болуп, хитайниң шәрқий қисимлиридики фуҗйән қатарлиқ өлкиләрдә вә шаңхәйдә һес қилинған; йапонийәниң окинава вилайитидиму тәврәш көрүнгән; филиппин даирилири деңиз шавқуни йүз бериш иһтималлиқиға қарита саһилларни тарқақлаштурушни тәләп қилған. 

тәйвән даирилириниң пәйшәнбә күни билдүрүшичә, йәр тәврәштә һазирғичә 10 адәм өлгән, миңдин артуқ адәм йариланған вә 52 адәм йоқап кәткән болуп, қапсилип қалған 700 адәм қутқузушни күтмәктә икән. 

хитай иҗтимаий алақә супилирида болса, тәйвәндики йәр тәврәшни мәсхирә қилиш вә хушаллиқни ипадиләш йазмилири вә инкаслири көпәйгән. әң чоң иҗтимаий алақә суписи вейбода бәзи қолланғучилар тәйвәндики йәр тәврәш һәққидә апәттин кәйип алғанлиқини билдүрүп мәсхирәт қилған. бәзи билогчилар һәтта бейҗиңни пурсәт болсила тәйвәнгә йардәм қилиш баһаниси билән ишғалийәткә әскәр әвәтишкә чақирған.

хитайниң тәйвән мунасивәт ишханиси йәр тәврәштин кейин бу дөләткә апәт йардими бериш тәклипи бәргәндин кейин, тәйвәнниң хитай ишлири ишханиси өзлириниң йардәмгә моһтаҗ әмәсликини оттуриға қойди.

хитайниң бирләшкән дөләтләр тәшкилатида турушлуқ муавин вәкили гең шуаң 3-апрел чаршәнбә күни бихәтәрлик кеңишидә, «хәлқара җәмийәтниң тәйвәндә йүз бәргән күчлүк йәр тәврәшкә көңүл бөлгән вә һесдашлиқ қилғанлиқиға миннәтдарлиқини билдүргән».

тәйвән мәркизи агентлиқиниң хәвәр қилишичә, гең шуаңниң бу сөзи тәйвәндә наразилиқ пәйда қилған. буниңға қарита, тәйвән ташқи ишлар министирликиниң байанатчиси лйу йоңҗйән наразилиқини ипадилигән. у хитайниң тәйвәндики йәр тәврәштин пайдилинип хәлқара сәһнидә идеологийә җеңи қилиштәк номуссиз қилмиши әйиблигән һәмдә бу пәқәт хитайниң тәйвәнгә қарита сийаси һесаб китабтин башқа йахши нийити йоқлуқидәк мустәбитлик характерини гәвдиләндүрди, дәп көрсәткән.

лйу йоңҗйән тәйвәнниң демократик сайланған һөкүмитиниңла хәлқарада 23 милйон 500 миң тәйвән хәлқигә вәкиллик қилалайдиғанлиқини, тәйвәнниң хитайниң бир қсими әмәсликиниң хәлқарада етирап қилинған обйектип пакит вә һазирқи әһвал икәникини қайта тәкитлигән.

у йәнә, тәйвәндә йәр тәврәш йүз бәргәндин кейин, нурғун дөләтләр вә хәлқаралиқ тәшкилатларниң тәйвән һөкүмити вә хәлқидин һал сорап йардәм қилғанлиқини тилға алған вә уларға рәһмәт ейтқан.

2024-йили 4-март