түркийәниң муавин сода министири мәһмут гүрҗан (оңда) үрүмчидики йеңидин ечилған хитай-түркийә сода мәркизидә түркийәниң бейҗиңда турушлуқ баш әлчиси исмаил һакки муса билән биллә көргәзмә қилинған түрк мәһсулатлирини тәкшүргән.

уйғур ирқий қирғинчилиқи давамлишиватқан, муһаҗирәттики уйғурлар түркийә һөкүмитидин техиму очуқ позитсийә күтүватқан бир шараитта, түркийә сода министирлиқи билән билән уйғур аптоном районлуқ һөкүмәт үрүмчидә бирләшмә кархана қурған вә түркийә-хитай сода мәркизи ечилған.

«бүгүнки түркийә» ториниң 23-февралдики хәвиригә қариғанда, «хитай-түркийә лесәнроң (шинҗаң) сода тәрәққийат ширкити» шәнбә күни үрүмчидә өткүзүлгән мурасимда рәсмий елан қилинған. ширкәтниң ечилиши үчүн районда зийарәттә болған түркийә муавин сода министири мәһмут гүрҗан үрүмчи әркин сода районида қурулған хитай-түркийә сода мәркизиниң ечилишиға қатнашқан. бу мәркәз уйғур аптоном районлуқ һөкүмитиниң қоллиши билән қурулған болуп, хитай сода тәрәққийат вә достлуқ җәмийити тәрипидин ечилған.

хитай-түркийә лесәнроң (шинҗаң) сода тәрәққийат ширкитиниң ечилиш мурасимидин көрүнүш, үрүмчи, 2025-йили 22-феврал.

мурасимдин кейин, мәһмут гүрҗан билән баш әлчиси исмаил һакки муса 270 квадрат метир көләмдики хитай-түркийә сода мәркизидә көргәзмә қилинған түрк мәһсулатлирини екскурсийә қилған.

хәвәрдә ейтилишичә, мәһмут гүрҗан паалийәт җәрйанида түркийәниң хитай билән болған алақини күчәйтиш ирадисини тәкитләп, сода, сайаһәт, мәдәнийәт, техника вә маарип җәһәттики һәмкарлиқ пурситини гәвдиләндүргән. гурҗанға түркийәниң бейҗиңда турушлуқ баш әлчиси исмаил һакки муса һәмраһ болған. у йәнә уйғур аптоном районлуқ парткомниң секретари ма шиңрүй вә районлуқ һөкүмәтниң рәиси әркин тунийаз қатарлиқ йуқири дәриҗилик әмәлдарлар билән көрүшкән.

2025-йили 23-феврал