рамизан өзгириш пәйтидур 

 муһәммәд йүсүп

рамизан өзгириш вә орнимиздин дәс туруш пәйтиду. әтрапимиздики һәммила нәрсә өзгириду, һәтта җамадатларму вақитниң өтүши билән өзгириду, пәқәтла инсан өзгиришни халимайду. чүнки, у өзиниң раһәт муһитини тәрк етишкә унимайду. «көнгән йаманму көйгәнму» дегәндәк, өзи көнүп қалған адәтлиридин айрилалмайду. навада инсанлар өзгәрсә дунйа өзгирәтти, әһвал өзгирәтти, һәтта хәритиләрму өзгирәтти. чүнки,  һайат өзиниң мөҗизилирини йатқанларға әмәс, һәрикәткә өткәнләргила әвәтиду.

биз көп вақитларда ичидә болуватқан раһәтлик муһитимизни тәрк етишни халимиғанлиқтин, һәммә адәтлинип қалған «кечикип қалдим» дин ибарәт әрзан сөзни ейтип қойимиз.

 әпсуски, көпинчимиз «кечикип қалдим», «болмайватиду», «қилалмаймән» дегәнгә охшаш сөзләр билән өзимизгә тәсәлли берип, нөвәттики муһим ишлиримиздин ваз кечимиз йаки уларни кечиктүримиз. әслидә биз һечқандақ ишқа кечикип қалмидуқ. чүнки җан тәндә болған муддәт ичидә биздә вақит бар, пурсәт бар вә үмид бар. атқан һәрбир таң бизгә пурсәтләрни суниду, биз һәр күни йеңидин туғулимиз. шуңа һечқандақ иш үчүн кечикип қалған болмаймиз.

һәсәл һәриси бир грам һәсәл үчүн гүл-чечәкләр арисида 7000дин көп қетим учидикән. мәһсулатини аз көрүп һәсәл бериштин ваз кәчмәйдикән, кечикипму қалмайдикән. шуңа униң мәһсулати һәммила йәрдә қиммәтлик икән. биз һәмишә гунаһни вақитқа артип қоймақчи болимиз. бу өзимизгә өзимиз қилған чоң һәқсизлиқтур.

әслидә һәр хил баһаниләрни тепип өзимизгә тәсәлли беришниң орниға дәрһал һәрикәткә өтүп әҗир қилсақ, аллаһ тааланиң йардими бизни қоршайду, көплигән гүзәл ишларни өзимиз туймастин вуҗудқа чиқиралаймиз.

өзини өзгәртишкә, бирәр нәтиҗә қазинишқа  интилмигән инсан су үстидики өлүк белиққа охшаш һайатниң боран- чапқунлири ичидә гаңгирап йүриду. алдимизда икки йол бар. бири, өзимиз талливалған раһәтлик муһиттин айрилишқа көзимиз қиймай, орнимиздин мидирлимаслиқ, йәнә бири, һәрикәткә өтүп өзгәртиш мумкин болған ишларни өзгәртиш вә қолимиздин кәлгән нәтиҗини йаритиштур.

һайат олтурған йеридин турушни халимайдиған, баһаниләрниң арқисиға сиғинип һәрикәткә өтмигән инсанларға һеч нәрсә бәрмәйду, чүнки у аҗайип мөҗизилирини орнидин турған вә һәрикәткә өткән инсанларға әвәтиду.