енергийә йуқумлуқтур

муһәммәд йүсүп

әҗдадлар ейтқан һекмәтләрниң һичбири бикарға ейтилған әмәс. «үрүк үрүкни көрүп ала болур» дегән сөзму шуларниң җүмлисидиндур. бу сөзни нәгә қойсақ қойалаймиз. биз бу сөздин йолға чиқип, актип енергийәлик инсанлар билән арилашқан адәмгә улардин актип енергийә йуқиду, пассип енергийәлик инсанлар билән арилашқан адәмгә улардин пассип енергийә йоқиду, десәк һәргиз хата болмайду. чүнки, һайатимизда актип енергийәлик иҗабий инсанларниң мәвҗут болғанлиқи биз үчүн немәт болғандәк, пассип енергийәлик сәлбий инсанларниң болғанлиқи ваба вә шумлуқтур.

аллаһ таала қуран кәримдә: «и иман ейтқанлар! аллаһтин қорқуңлар вә растчиллар билән биллә болуңлар»[1] дәп көрсәткән. пәйғәмбәр әләйһиссалам: «инсан өзи арилашқан адимигә охшайду, шуңа арилишидиған адимиңларни йахши таллаңлар»[2] дегән. америкилиқ йазғучи җемис роһн «инсан өзи әң көп арилашқан бәш инсанниң йиғиндисидур» дегән икән. чүнки, инсан өзи арилашқан кишилиридин аңсиз һалда көп нәрсиләрни қобул қилиду, иҗабий кишиләрдин иҗабийлиқни, сәлбий кишиләрдин сәлбийликни қобул қилиду. шуңа иҗабий, үлгилик кишиләр билән арилишиш биз үчүн пайдилиқтур.

һайатиңиздики инсанларни әлгәктин өткүзүң

көңлиңиз биарам, өзиңиз үмидсиз, күнлириңиз ғәмкин, роһиңиз чүшкүн, ишлириңиз нәтиҗиисиз өтүватқан болса, өзиңизни тәкшүрүп көрүң вә һайатиңиздики достларни, арилишидиған кишиләрни көздин кәчүрүң, сизгә енергийә бериватқан кишиләрни әлгәктин өткүзүң, андин пассип енергийәлик кишиләрни һайатиңиздин чиқириң, актип енергийәлик кишиләрни чиң тутуң, улар билән достлуқиңизни вә мунасивитиңизни күчәйтиң, шундақ қилсиңиз актип енергийәгә игә болисиз.

иҗабий кишиләр билән арилашсиңиз:

-        улар роһиңизни йеңилап туриду,

-        улар сизгә илһам берип туриду,

-        улар сизгә қийинчилиқларға әмәс, һәл қилиш чарисиға әһмийәт беришни өгитиду,

-        улар сизгә актип енергийә бериду,

-        улар сизни йуқириға көтүриду,

-        улар сизниң хушаллиқиңизни ашуриду,

-        улар сизниң һайатқа болған көзқаришиңизни йеңилайду,

-        улар сизниң өз ишәнчиңизни күләндүриду.

 

сәлбий кишиләр билән арилашсиңиз:

-        улар сизниң ғәмкинликиңизни вә үмидсизликиңизни ашуриду,

-        улар сизниң енергийәңизни емиду,

-        улар сизниң чариләр билән болушниң орниға қийинчилиқлар билән қелишиңизға сәвәб болиду.

-        улар сизниң вақтиңизни оғрилайду,

-        улар сизни төвәнгә тартиду,

-        улар сизниң роһиңизни зәһәрләйду,

-        улар сизни ғәмкин қилиду.

 иҗабий инсанларниң бизгә қошидиғанлири билән сәлбий инсанларниң биздин алидиғанлирини санап түгәткили болмайду. сизниң күнлириңиз мәйли йахши өткән болсун йаки начар өткән болсун, униңда һайатиңиздики инсанларниң чоқум тәсири бар. шуни унтумаңки, сиз халимиған бирси сизниң һайатиңиздин орун алалмайду, сәлбий инсанлар өзлириниң пассип енергийәсини сизгә мәҗбурлап таңалмайду, бу пәқәт сиз йол қойғанда болиду. шуңа сиз уларға йол қоймаң, уларни һайатиңизға йолатмаң.



[1] тәвбә сүриси: 119- айәт.
[2] имам әбу давуд, тирмизи ривайити.

 

муһәммәд йүсүп ислам билимлири тори

2025-йили 25-феврал