америка билән хитай арисидики сода уруши давамлишиватқан бир пәйттә, хитай канаданиң бир қисим деһқанчилиқ мәһсулатлириға қошумчә таможна беҗи қойғанлиқини илан қилди.

хитай 8-март шәнбә күни канаданиң өткән йили өктәбирдә хитайниң токлуқ машинилири, полат-төмүр вә алйумин мәһсулатлириға таможна беҗи қойғанлиқиға қарита, канаданиң қича йеғи, қорулған торт вә нуқут қатарлиқ һәр хил деһқанчилиқ мәһсулатлириға таможна беҗи алидиғанлиқини елан қилди. 

ройтерс агентлиқиниң хәвәр қилишичә, хитай бу қетим 2 милйард 600 милйон доллар қиммитидики деһқанчилиқ мәһсулатлири вә йемәкликләргә таможна беҗи қойған. бу трамп башчилиқидики сода урушида йеңи бир сәһипиниң ечилиши дәп қаралған. 

хитай сода министирлиқи канаданиң хитай маллириға қойған баҗлири һәққидә «дунйа сода тәшкилатиниң қаидилирини бузди. бу хитайниң мәнпәәтигә зийан салидиған кәмситиш тәдбири» дегән. 

шәнбә күни хитай малийә министирликиниң тор бетидә елан қилинған байанатқа қариғанда, мушу айниң 20-күнидин башлап, канададин кәлгән қича йеғи, майда пишурулған торт вә нуқутларға %100 баҗ елинидикән, канададин кәлгән су мәһсулатлири вә тоңгуз гөшигә %25 таможна беҗи елинидикән.

канада баш министири җастин тирудо буниңдин илгири мәзкур баҗ сийаситиниң хитайниң дөләт йардимигә еришкән нормидин артуқ ишләпчиқириш сийаситигә җаваб қайтуруш үчүн йүргүзүлгәнликини, америка вә йавропа иттипақиниңму охшаш һәрикәтләрни қолланғанлиқини билдүргән.

тәһлилчиләр таможна беҗи қойушниң агаһландуруш ролини ойниғанлиқини илгири сүрди. трамп һөкүмити буниңдин илгири әгәр бу дөләтләрму хитай таварлириға %20 таможна беҗи қойса (америкиниң фентанил мәсилисидә хитайға қойған таможна беҗиға охшаш), америкиниң канада вә мексикиға қойған %25 импорт таможна беҗини бошитишни ойлишиши мумкинликини ишарәт қилған.

2025-йили 10-март