тайландниң бир йуқири дәриҗилик әмәлдари америка һөкүмити вә йавропа парламентиниң тайландниң 40 уйғурни хитайға қайтурғанлиқиға қарши тәдбирлириниң тайландқа һечқандақ тәсир көрсәтмәйдиғанлиқини ейтти.

тайландта 11 йилдин буйан тутуп турулған уйғурлардин 40 нәпири өткән айда хитайға тапшуруп берилгәндин кейин, йавропа парламенти қарар мақуллап тайландниң һәрикитини тәнқид қилған иди, америка ташқи ишлар министирлиқи болса тайланд әмәлдарлириға виза имбаргоси йүргүзүдиғанлиқини елан қилди.

тайланд «милләт» гезитиниң 17-март хәәр қилишичә, тайланд дөләт мудапиә министири фумтам вечайачай (Phumtham Wechayachai ) дүшәнбә күни: «йавропа иттипақи вә америкиниң уйғурларниң чеградин қоғлап чиқирилишиға қарши һәрикити тайландқа һечқандақ тәсир көрсәтмәйду» дегән.

хәвәрдә ейтилишичә, фумтам бу хәлқаралиқ һәрикәтләрниң тайландқа тәсир көрсәтмигәнликини йәнә бир қетим тәкитләп, мәтбуатларни уларниң иқтисадий тәсирини һәддидин зийадә тәһлил қилмаслиққа чақирған.

у йәнә мундақ дегән: «ташқи ишлар министирлики аллиқачан ениқ байанат елан қилди, шуңа униң чүшәндүрүшигә әмәл қилиңлар. мениңчә сәвәбләр йетәрлик, башқиларниң техиму көп пикир байан қилишниң һаҗити йоқ».

америка һөкүмитиниң имбарго қараридин кейин, тайланд ташқи ишлар министирлики шәнбә күни байанат елан қилип, «хитай һөкүмитидин уйғурларниң бихәтәрликигә мунасивәтлик капаләтләрни тапшурувалғанлиқи» вә «бу гуруппиниң аманлиқини давамлиқ қоғдайдиғанлиқи» ни оттуриға қойған.

40 нәпәр уйғур 27-феврал баңкоктики көчмәнләрни тутуп туруш мәркизидин қәшқәргә әвәтилгәндин кейин, хитай дипломатик органлири вә таратқулири бу уйғурлардин бириниң аилиси билән «җәм болған» рәсимини тарқитип, улар қийин-қистақ йаки һайати тәһдиткә учриши мумкин, дегән әндишиләрни йоқитишқа урунған иди.

2025-йили 17-март