солдин оңға: хоңкоң сақчи комиссари раймонд сийу, хоңкоң алаһидә мәмурий районлуқ һөкүмәтниң әдлийә ишлири катипи лам тиң кук, дөләт бихәтәрлик комитетиниң баш катипи ав чихоң вә хитай һөкүмитиниң хоңкоңдики дөләт бихәтәрликини қоғдаш ишханисиниң башлиқи доң җиңвей.
америка ташқи ишлар министирлиқи 31-март дүшәнбә күни хоңкоң вә тибәттики сийасий бастурушларға мәсул хитай әмәлдарлириға виза имбаргоси йүргүзгәнликини илан қилди. игилинишичә, бу доналд трампниң йеңи вәзипигә олтурғандин буйан тунҗи қетим хоңкоң әмәлдарлириға кишилик һоқуқ мәсилиси сәвәблик җаза йүргүзүши икән.
америка ташқий ишлар министири марко рубийо дүшәнбә күни байанат илан қилип, америка тәдбир қоллинип, чәтәлликләрниң тибәт райониға кир шигә мунасивәтлик сийасәтләргә қатнашқан хитай әмәлдарлириға қошумчә виза чәклимиси қойди деди.
рубио байанатида мундақ деди: «бәк узун вақиттин буйан, хитай компартийиси америка дипломатлири, журналистлири вә башқа хәлқаралиқ көзәткүчиләрниң тибәт аптоном райони вә хитайдики башқа тибәт районлириға киришини рәт қилди, һалбуки хитай дипломатлири вә журналистлири америкида кәң зийарәт қилиш һоқуқидин бәһримән болди.
байанатта һеч қандақ бир әмәлдарниң исми тилға елинмиған. ташқи ишлар министирлики йәнә бәзи әмәлдарларниң чәтәлгә чиқип кәткән «демократийәни қоллайдиған 19 паалийәтчини қорқутуш, җимиқтуруш вә паракәндичилик селиш» қилмишиға четишлиқ дәп көрсәтти. игилинишичә, бу паалийәтчиләр ичидә бир америка пуқраси вә төт америка аһалиси бар икән.
рубио буниңдин илгири тайланд әмәлдарларға уйғурларни хитайға қайтурғанлиқи сәвәбидин җаза йүргүзгән иди.
америка ташқи ишлар министирлиқи дүшәнбә күни айрим бир қарарда, дунйа пул-муамилә мәркәзлириниң бири болған хоңкоңда давамлишиватқан сийасий бастурушларға четишлиқ сақчи әмәлдарлириға җаза йүргүзди.
мәлум болушичә, хоңкоң сақчи комиссари раймонд сийу чак йе (Raymond Siu Chak-yee) вә әдлийә министири паул лам (Paul Lam) қатарлиқ алтә нәпәр хитай вә хоңкоң әмәлдари «дөләт бихәтәрлик қануни»ға асасән дөләт һалқиған бастуруш вә хоңкоңдики аммиви әркинликни бастуруш билән әйибләнгән.
игилинишичә, сақчи комиссари раймонд сийу чак йе вә башқиларға қаритилған җаза даирисидә, уларниң америкида сақлиған һәр қандақ байлиқи тоңлитилиду һәмдә омумән улар билән болған пул-муамилә содиси америка қануни бойичә җинайи қилмишлириға киргүзүлиду.
рубио байанатида мундақ деди: бу җаза «трамп һөкүмитиниң хоңкоңдики кишиләрни қоғдилидиған һоқуқ вә әркинликтин мәһрум қилишқа, шундақла америка туприқида йаки америка хәлқигә қарши дөләт һалқиған бастуруш һәрикәтлиригә мәсул болғанларни сүрүштүрүш вәдисини көрситип бериду».
игилинишичә, имбарго тизимликидә хоңкоң сақчи комиссари раймонд сийу чак-йе, хоңкоң алаһидә мәмурий районлуқ һөкүмәтниң әдлийә әмәлдари паул лам, хоңкоң дөләт бихәтәрлик комитетиниң баш катипи сонний чи квоң ав, хитайниң хоңкоңда турушлуқ дөләт бихәтәрликни қоғдаш ишханисиниң мудири доң җиңвей, сақчи ишлири йардәмчиси дийаң чуң чуң воң бар икән. буниңдин башқа, хоңкоңниң баш иҗраийә әмәлдари җон ли узундин буйан америкиниң җаза тизимликигә киргүзүлгән.
2025-йили 31-март
