2025-йили 31-март, таҗикистан, қирғизистан вә өзбекистан президентлири хуҗәндкә йиғилип, үч дөләт чеграсини айриш вә рәсмий достлуқ хитабнамиси орнитиш тоғрисида келишим имзалиди. бу илгириләш илгири таҗикистан билән қирғизистан оттурисида узундин буйан давамлишип келиватқан территорийә тоқунушини һәл қилған чегра шәртнамисини өз ичигә алған һәл қилиш урунушлиридин кейин оттуриға чиқти. бу келишим район һәмкарлиқини күчәйтип, муқимсизлиқни кәлтүрүп чиқарған тарихий наразилиқларни һәл қилишни мәқсәт қилидикән.
игилинишичә, 31-март таҗикистанниң хоҗәнд шәһиридә қирғизистан пирезиденти садир җапароф, таҗикистан пирезиденти имомали раһман вә өзбекистан пирезиденти шәвкәт мирзийойофниң иштирак қилиши билән өткүзүлгән йиғиндин кейин, үч тәрәп чегра мәсилиси һәққидики келишимгә имза қойған.
хуҗәнд хитабнамиси чегра мәсилисидә келишим һасил қилиш билән биргә, район һәмкарлиқи вә муқимлиқиниң символи дәп қаралди. бу һәқтики байанатта үч тәрәплик келишимниң, шундақла қирғизистан билән таҗикистан оттурисидики дөләт чеграси келишиминиң муқимлиқ вә изчиллашқан тәрәққийат нишанлирини капаләткә игә қилиш, пүтүн районниң хәлқарадики абруйини зорайтиш мәқситигә хизмәт қилидиғанлиқи вә шундақла қериндаш дөләтләрниң қошнидарчилиқ, ишәнч вә истратегийәлик һәмкарлиқ мунасивитиниң күчийишиниң йеңи бәлгиси болидиғанлиқи қәйт қилинған.
бу келишимниң имзалиниши қирғизистан вә таҗикистан пирезидентлириниң 13-март дөләт чеграси тоғрисида келишим имзалишидин икки һәптидин көпрәк вақит өткәндин кейин ройапқа чиққан. бу келишим икки оттура асийа дөлити оттурисидики узун муддәттин буйан давамлишип кәлгән вә йеқинқи йилларда тоқунуш мәнбәси болуп кәлгән низани һәл қилди, дәп қаралмақта.
оттура асийа дөләтлири совет иттипақи парчиланғандин буйан чегра маҗирасиға дуч кәлди. давамлишиватқан земин маҗиралири арилап тоқунушни кәлтүрүп чиқарди. мутәхәсисләрниң қаришичә, йеңи келишим алақидар дөләтләр үчүн дипломатик ғәлбигә вәкиллик қилиду һәмдә өзгириватқан дунйа вәзийитидә районни муқимлаштуруш үчүн техиму кәң тиришчанлиқларни көрситиду.
2025-йили 3-април
