америкиниң бир парламент әзаси америка һөкүмитиниң шәрқий түркистанға четишлиқ ширкәтләр билән сода қилишини чәкләш тәләп қилинған «уйғур мәҗбурий әмгикигә доллар йоқ» дегән қанун лаһийәсини қайта тонуштурған.
америка KLTV қанилиниң хәвәр қилишичә, америкиниң авам палатаси әзаси насанийел моран (Nathaniel Moran) йеқинда «уйғур мәҗбурий әмгикигә доллар йоқ» дәп тема қойулған, америка һөкүмитиниң шәрқий түркистан билән алақиси бар барлиқ ширкәтләр билән сода қилишини чәкләш тәләп қилинған қанун лайиһәсини қайтидин парламентқа сунған. мәзкур қанун лайиһәси илгири авам палатасида мақулланған болсиму, кеңәш палатасиниң тәстиқидин өтәлмигәникән.
авам палата әзаси моран сәйшәнбә KLTV телевизийәсиниң бу лаһийәси тоғрисидики зийаритини қубул қилғинида, хитайниң уйғурларға қарши ерқий қирғинчилиқ қиливатқанлиқини тәкитләп, «хитай наһайити әхлақсизлиқ билән иш беҗириватиду. биз дунйада қуллуқ әмгикиниң шерики болуп қелишни халимаймиз. буни (уйғур қуллуқ әмгикини) йоқутуш керәк» дәп билдүргән. моран сөзидә бу қанун лаһийәсиниң икки асаслиқ мәқситиниң барлиқини билдүрүп, «биз уларниң әхлақсизлиқ вә иқтисадий һәрикәтлирини кәйнигә йандурушимиз керәк» деди. у зийарәт җәрйанида хитайниң америкаға келидиған әң чоң ташқи тәһдит икәнликини муәййәнләштүрүп, хитайниң американиң дүшмини икәнликини кәскинлик билән оттуриға қойди.
насанийел моран бу һәқтә тохтилип, хитайниң интайин әхлақсиз тәриқидә һәрикәт қиливатқанлиқини, америкиниң дунйадики қул әмгикигә шерик болуп қелишни халимайдиғанлиқини билдүргән. у мәзкур қанун лайиһәсини хитайниң мәсулийитини сүрүштә қилиштики бир қәдәм дәп қарайдиғанлиқи вә хитайниң вәһшийанә қилмишлирини тосуштики йахши бир илгириләш икәнликини тәкитлигән.
доналд тирамп йеңидин вәзипигә олтурғандин буйан, уйғурларға алақидар бир қисим қанун лайиһәлири қайтидин парламентқа сунулуватқан болуп, бир нәччә күн бурун америка авам палатасиниң икки партийәгә тәвә 12 палата әзаси хитайдики бастуруштин қечип чиққан уйғурлар вә башқа милләтләрниң америкида панаһлиқ тиләш ишлирини асанлаштурушни, қошумчә йардәм тәминләшни мәқсәт қилған «уйғур инсан һәқлирини қоғдаш қанун лайиһәси»ни қайтидин парламентқа сунғаниди.
2025-йили 5-април
