хитай компартийәси мәркизий комитети сийасий бйуросиниң әзаси вә мәмликәтлик сийасий қанун комитетиниң секритари чен венчиң өткән һәптә шәрқий түркистанда төт күнлүк зийарәттә болуп, хитай тилини кәң даиридә ишлитиш вә аталмиш «террорлуққа қарши туруш»та тәврәнмәй чиң турушниң муһимлиқини алаһидә тәкитлигән.
шинхуа агентлиқиниң хәвиригә қариғанда, чен венчиң өткән пәйшәнбидин йәкшәнбигичә шәрқий түркистанда 4 күнлүк зийарәттә болған икән. у бу қетимқи зийаритидә үрүмчи, қәшқәр вә ақсу қатарлиқ шәһәрләргә барған болуп, һәр дәриҗилик һөкүмәт кадирлири билән көрүшкән. чен венчиң бу қетимлиқ тәкшүрүштә аталмиш «террорлуққа қарши туруш, террорлуқниң алдини елиш, муқимлиқни қоғдаш» сийаситиниң әмәлийлишиш әһвалини, алақидар хизмәтләрни тәкшүргән вә бу йил аталмиш «уйғур аптоном райони» қурулғанлиқиниң 70 йиллиқи икәнлики, бу сәвәблик зораванлиқ, террорлуқни қаттиқ җазалашта қәтий тәврәнмәй чиң туруш керәклики, зораванлиқ, террорлуқ вәқәси йүз бәрмәслик төвән чекини қәтий сақлаш, диний әсәбийлик идийәси туприқини йоқитиш керәклики һәққидә җар салған.
җәнубий хитай әтигәнлик гезитиниң бу тоғрисидики хәвиридә ейтилишичә, чен венчиң «биз қанунни қаттиқ иҗра қилип, қанун бойичә зораванлиқ вә терроризм җинайәтлиригә қаттиқ зәрбә беришимиз, шундақла диний әсәбийлик бих үндиған тупрақни йоқутишимиз керәк. һәр қандақ террорлуқ баш көтүриши һаман дәрһал уҗуқтурушимиз керәк» дегән.
җәнубий хитай әтигәнлик гезитиниң билдүрүшичә, хитай әмәлдари бу зийаритидә йәнә йәрлик бихәтәрликни қоғдаш органлири билән көрүшүп, уларниң җәмийәтниң аманлиқи вә узун-муддәтлик тинчлиқни сақлашни асасий нишан қилишини тәкитлигән. у сөзидә, «терроризмға қарши» тәдбирләрни қанунлаштуруш вә нормаллаштурушқа чақириқ қилип, хитай тилиниң уйғур районидики барлиқ аз санлиқ милләтләр арисида кәң даиридә ишлитилишини оттуриға қойған.
игилинишичә, чен венчиң бултур 5-айдиму шәрқий түркистанға берип, қәшқәр, ғулҗа, үрүмчи вә 4-дивизийә қатарлиқ җайларни тәкшүргән болуп, охшашла аталмиш «террорлуққа қарши туруш, муқимлиқни қоғдаш, чегра мудапиәсини күчәйтиш» қатарлиқ террор сийасәтлирини тәкитлигәниди.
хитайниң йуқири дәриҗилик бу бихәтәрлик мәсилисигә мәсул әмәлдариниң америка билән хитай арисидики сода уруши җиддийләшкән бир вақитта шәрқий түркистанни төт күн зийарәт қилип йәнә аталмиш терроризмға қарши турушқа чақириқ қилиши алаһидә диққәт қозғимақта. хитай һөкүмити узун йиллардин бери хәлқарада һәр заман өзигә пайдисиз бир чоң вәзийәт вәйаки сийасий кризис пәйда болғанда, әң аввал муқимсиз чегра райони дәп қаралған уйғур районида иҗтимаий муқимлиқни тәкитләп, өзигә қарши һәр қандақ бир һәрикәтниң йүз беришиниң алдини елиш үчүн терроризмни баһанә қилип тәййарлиқ қилип кәлгән иди. йу венчиңму уйғур райониға қаратқан бу қетимқи сәпиридә нәқ мушу нуқтиларни алаһидә тәкитлигән.
2025-йили 16-април
