түркийәниң истанбул шәһиридә чаршәнбә күни чүштә 6.2 бал йәр тәвриди. күчлүк йәр тәврәш әтраптики шәһәрләр вә қошна дөләтләрдиму һес қилинған болуп, кишиләр техиму чоң йәр тәврәш йүз беришидин әндишә қилип сиртларда вақт өткүзди. түркийә даирилири йәр тәврәшә йариланғанларниң барлиқини, әмма қазаға учриғанларниң йоқлуқини билдүрди.
түркийә апәт вә җиддий әһвал башқармиси ( AFAD) ниң билдүрүшичә, 23-април чаршәнбә күни 12:49 да йүз бәргән йәр тәврәш әң күчлүк болуп, униң дәриҗиси 6.2 дәриҗигә йетип барған. йәр тәврәш истанбул, текирдағ, йалова, бурса вә баликесирдә күчлүк һес қилинғанлиқи оттуриға қойулған.
истанбул шәһәрлик һөкүмәтниң билдүрүшичә, мәзкур шәһәрдә чаршәнбә күни алди-кәйни болуп 50 қетимдин артуқ йәр тәвригән. истанбул һөкүмәт даирлири һазирчә бу йәр тәврәштә һеч кимниң қаза тапмиғанлиқини билдүрүп, пәқәт 151 кишиниң биналардин сәкрәп зәхимиләнгәнликини дегән. истанбулдики егиз биналар бу йәр тәврәштә қаттиқ силкингән болсиму, әмма биналарда өрүлүш болмиған.
хәвәрләрдә ейтилишичә, истанбулдики пуқралар бу 6.2 дәриҗидики йәр тәврәшни йеқинқи йиллардин буйанқи әң чоң йәр тәврәш дәп һес қилғанлиқини ейтип, бундин кейин техиму чоң йәр тәврәш мумкинчилики барлиқидин әндишә қилидиғанлиқини ипадилигән. истанбул муһаҗирәттики уйғурлар мәркәзләшкән шәһәрләрниң бири болуп, бир қисим уйғурларму өзлириниң күндүздә сиртқа чиққанлиқини вә кечини сиртта өткүзүшни қарар қилғанлиқини билдүрүшти.
түркийә ички ишлар министири әли йәрликайа байанат илан қилип, мармара деңизида 12.49 да 6.2 бал йәр тәвригәнликини, тәврәш мәркизи тәхминән 7 киломитир чоңқурлуқта болған йәр тәврәшниң җәмий 13 секунт давамлашқанлиқини билдүрди. у мундақ деди: «силивири деңиз қирғиқидин 24 киломитир йирақлиқтики йәр тәврәш истанбул башчилиқида тәкирдағ, йалова, бурса вә баликәсир қатарлиқ җайлард тәсирини көрсәтти. саәт 17:55 өткичә җәмий 127 қетим қалдуқ йәр тәвригән болуп, әң йуқириси 5.9 ба. тәврәш дәриҗиси 4 вә униңдин йуқири йәр тәврәшниң омумий сани болса 7 қетим».
түркийәниң җуғрапийиси йәр тәврәш бәлвеғида җайлашқанлиқи үчүн чоң йәр тәврәшләр давамлиқ болуп туриду. 2023 -йили 2-айда түркийәниң җәнубий қисмида йүз бәргән вә 10 вилайәткә тәсир көрсәткән чоң йәр тәврәштә 55000 дин артуқ адәм қаза тапқан иди.
йәр тәврәштин кейин даириләр аһалиләрни амал бар хәтәрлик бина вә җайлардин йирақ турушқа агаһландуруп, мәктәп, мәсчит вә башқа аммиви муәссәсәләрни хәлқниң пайдилинишиға ечивәткән болуп, чаршәбә күни кәчтә нурғун киши кечини сиртта өткүзүшни қарар қилип, очуқ мәйданларға йиғилди. түркийә маарип министирлиқи болса, истанбулдики мәктәпләрниң икки күн дәм елишқа қойуп берилгәнликини илан қилди. истанбул валийлиқи болса, һөкүмәт орунлирида ишләйдиған мейип, һамилдар йаки 10 йаштин төвән балиси бар аниларға рухсәт берилгәнликини билдүрди.
2025-йили 23-април
