әнглийә һөкүмити йеңидин қурулған дөләт игиликидики енергийә ширкитидә уйғур мәҗбурий әмгики билән ишләпчиқирилған қуйаш енергийәлик батарейә тахтиси ишләтмәсликкә капаләтлик қилидиғанлиқини билдүрди. әнглийә парламенти чаршәнбә мәзкур ширкәткә мунасивәтлик қанун лайиһисигә түзитиш киргүзүп, бүйүк британийә енергийә ширкитиниң йеңи енергийә асаслиқ қурулушлирини елип барғинида әхлақий тәминат зәнҗирлирини ишлитиштә бир йетәкчилик рол ойнайдиғанлиқини билдүрди.
хәвәр қилинишичә, әнглийәниң енергийә бихәтәрлики министири едвард милибәнд бу һәқтики қанун лайиһәсигә түзитиш киргүзмәктикән. у әнглийәниң дөләт игидарчилиқидики йеңи ширкити «бүйүк биританийә енергийә ширкити»ниң мәҗбурий әмгәк мәһсулатлиридин халий болушиға капаләтлик қилидиғанлиқини билдүрүп: «әпсуски, хитайниң дөләт буйруқи билән болған мәҗбурий әмгәк мәсилиси йеңилинидиған енергийә саһәсини омумйүзлүк қаплиди» дегән.
әнглийә енергийә министири майкол шәңкс бу тоғрисида тохтилип, «бүйүк британийә енергийә ширкити мәҗбурий әмгәктин хали бир санаәт йетәкчиси болуп, у бизниң бу пәвқуладдә пакиз енергийә вәзипимизни ада қилишта алдиға қарап илгирлитиду. әнглийә хәлқи өзи игә болған вә улар үчүн хизмәт қилидиған бу бүйүк британийә енергийә ширкити биз өзимизниң пакиз енергийә кәлгүсимизни йаритишта пәхирләнгүдәк бир орун болуп һесаблиниду» дегән.
«бүйүк биританийә енергийә ширкити» бултур ийулда йеңилинидиған енергийә саһәсини күчәйтиш вә енергийә чиқимлирини төвәнлитиш үчүн, әмгәк партийәси тәрипидин оттуриға чиқирилған болуп, «бүйүк биританийә енергийә қанун лайиһәси» парламентта мақулланғандин кейин рәсмий қурулидикән.
енергийә хәвпсизлик министири милибанд 21 - март күни әнглийә енергийисиниң 180 милйон понд-стерлиң қиммитидики тунҗи қурулушини оттуриға қойған болуп, униңда 200 мәктәпниң өгзисигә күнтахта бекитилидикән. милибанд мухбирларниң соалиға җаваб бәргинидә бир қисим күнтахтиларниң хитайдин келидиғинини етирап қилған иди.
әнглийә парламент әзаси давид алтон буниңға наразилиқ билдүрүп, өзиниң твиттер (X) һесабида уйғур қуллуқ әмгики арқилиқ йасалған күнтахтиларни ишлитишниң әхлақсизлиқ икәнлики вә буниңда әнглийәниң қоли болмаслиқиға чақириқ қилған иди.
хәвәрдә қуйаш енергийәлик батарейә тахтисиниң асаслиқ материйали болған көп киристаллиқ киремнийниң йәршариви тәминатиниң %45 иниң шәрқий түркистандин келидиғанлиқи, бу мәһсулатларниң уйғурларни системилиқ бастуруш, кәң көләмдә мәҗбурий әмгәккә селиш арқилиқ ишләпчиқирилидиғанлиқи қәйт қилинған.
америка һөкүмити «уйғур мәҗбурий әмгикини чәкләш қануни»ни иҗра қилишқа башлиғандин буйан, шәрқий түркистанда ишләпчиқирилған пахта мәһсулатлири, шохла мәһсулатлиридин сирт, қуйаш енергийәлик батарейә тахтиси мәһсулатлириму уйғур мәҗбурий әмгикидики асаслиқ нишанлардин бири болмақта.
2025-йили 26-април
