рәсимдә, мениң йенимда олтурған үчинчи киши моро мусулманлириниң һазирқи рәиси һаҗи мурат ибраһим.
аптори: мир камил кашғәрий
муқәддимә
қәлбидә азадлиқ оти өчмигән, көзлири шәпәқ нуриға тәлмүргән әзиз қериндашлиримға моро муҗаһидлиридин салам!
76 йиллиқ үмид, 76 йиллиқ күрәш, 76 йиллиқ қурбанлиқ... қан вә йаш билән йезилған шәрқий түркистан азадлиқ күриши дастанимизниң сәһипилирини үмидсизлик туманлири қаплиған, роһимиз чарисизликниң сазлиқиға петип, өзимизни нәпәс алалмайватқандәк һес қиливатқан мушу күнләрдә, келиңлар, бир-биримизниң йүрикигә қулақ селип, қайтидин сирдишайли!
илгири биз һиндистанниң от йүрәк оғлани субһас чандра босниң полат ирадисидин илһам елип, вәтинимиз шәрқий түркистанниң азадлиқ йолиға хәритә сизишқа урунған идуқ. у дастан көпчиликимизниң каллисида йеңи упуқларни ачти. әмдиликтә мән силәрни тарихниң қәғәзлиридин әмәс, бәлки иман билән йезилған, қан билән суғирилған вә ғәлибә билән тамғаланған һайатлиқ дастаниға башлаймән. бу — биз билән охшаш қиблигә йүзләнгән, охшаш тәқдирни йашиған, охшаш дуани қилған, йоли бизгә техиму йеқин вә мас келидиған, әмма ахирида бир пүтүн дунйани һәйран қалдурған бир мөҗизиниң сиридур.
бүгүн мән силәрни ғәрбниң роһсиз һоқуқ каридорлириға әмәс, америка парламентиниң муздәк заллириға әмәс, бәлки тинч окйанниң йирақлиридики җиһадниң тирик, нәпәс еливатқан йүрикигә — һәр бир йопурмиқидин шаһадәт шәбними тамчип туридиған йамғурлуқ җаңгалларға, һәр бир ғерич тописи пидаийларниң қени билән суғирилған мубарәк тағ-қирларға, ислами вә имани үчүн 400 йил бойи тиз пүкмигән моро мусулманлириниң отлуқ дастаниға башлап баримән!
қени, шу мөҗизигә айланған ғәлибини роһимиз билән тәсәввур қилип беқайли!
қандақ бир илаһий инайәт, 11-синтәбир питнисидин кейин пүтүн дунйада «җиһад» кәлимиси зәһәргә айландурулған, тәкбир ейтилған һәр қандақ байраққа төһмәт йамғури йеғиватқан бир дәврдә, уларниң муқәддәс җиһад байриқини бу зәһәрлик боран-чапқунлардин тинч - аман сақлап қалалиди? дунйа «терор» сөзи билән титригән шу зулмәтлик күнләрдә, улар өз күришиниң шәрипини қандақ қилип кирлитип қоймай, һәтта залим дүшмининиму өзлириниң әхлақи алдида баш егишкә мәҗбурлийалиди?
қандақ бир уста истратегийилик қоманданлиқ, өзиниң әң шир йүрәк оғланлирини афғанистан вә чечинистанниң отлуқ җәңгаһлириға әвәтип, әмәлий уруңшларда полаттәк тавлиған туруқлуқ, уларни йат идийәләрниң күлигә миләнмәстин, ғайисиниң саплиқини сақлиған һалда қайтуруп келәләйдиған иманий интизамни йараталиди? улар өзлириниң муқәддәс ғайисини дунйаниң қалаймиқанчилиқлиридин вә хәлқаралиқ терорлуқ тәшкилатлириниң тозиқидин қандақ сақлап, өз йолини мустәқил давамлаштуралиди?
әң һәйран қаларлиқи! қандақ бир рәһбәрлик, бир қолида аллаһниң вәһйиси болған қуранни, йәнә бир қолида милләтниң ғурури болған қорални мәһкәм тутуп, бүркүттәк өткүр нәзири билән дунйа сийаситиниң хәритисини тәң оқуп маңалиди? қандақ қилип улар җаңгаллиқниң лай-патқақлиридин бир дөләтниң улини қуруп чиқип, көзлирини бир дәмму әрштин үзмәй туралиди? улар мустәқиллиқ үчүн һәммә нәрсини қурбан қилишқа тәййар туруп, әмма иманидин бир зәрричиму ваз кәчмәсликниң сирини зади қәйәрдин тапти?
дәрвәқә! ислам үммитиниң йеқинқи заман тарихи исламий һәрикәтләрниң қәбристанлиқиға айланған, сан-санақсиз байрақлар йа мурәссә (тәнәззул) шамилида йиқилған йаки зулум (һәзимәт) боринида йиртилип кәткән бир дәврдә, пәқәт уларниңла байриқи аллаһниң йардими (нусрәт) билән ғәлибә туприқиға тикләнди! бу — уларниң һәрикәт йадроси болған җиһад роһидин вә иман әқидисидин қилчә тәврәнмәй туруп, ғәлибә чоққисиға йәткән, аллаһниң вәдисиниң һәқ икәнликини испатлиған бирдинбир байрақтур!
мән әнә шу шанлиқ ғәлибиниң дастанини, уларниң һәр бир қәдимини, истратегийәлик пиланлирини вә ғәлибисиниң ачқучлуқ сирлирини силәр билән бөлүм-бөлүм һаләттә ортақлишишни нийәт қилдим.
бу пәқәт бир һекайә аңлаш әмәс. бу — бирликтә тәпәккур қилидиған, қәлбимиз билән һес қилидиған вә роһимиз билән дәрс алидиған, җиһад вә истратегийәниң бир «һалқа»сидур (өгиниш чәмбирикидур). һәр бир бөлүмниң ахирида, биз «шәрқий түркистан азадлиқ күриши үчүн қайси нурлуқ йолларни таптуқ? қайси қараңғу өстәңләрдин һәзәр әйлишимиз керәк? қайси полат қорғанларни өрнәк қилалаймиз?» дегән соалларға бирликтә җаваб издәймиз.
мәқситимиз — бу улуғ ғәлибиниң отидин бир ачқуч йасап, заманниң роһиға вә өзимизниң реаллиқиға уйғунлаштуруп, һәр бир қәдими инчикә пиланланған, истратегийә билән тактика бирләштүрүлгән бир йол хәритисини бирликтә вуҗудқа кәлтүрүштур.
бу сәпәрдә мени йалғуз қоймай, инкас, соал вә тәнқидий пикирлириңлар билән йол хәритимизниң техиму мукәммәллишишигә һәссә қошушиңларни, қараңғуда йолимизни йорутидиған чирағ болуп беришиңларни вә бу мәшәлниң йоруқиниң башқа қәлбләргиму йетип бериши үчүн уни кәң һәмбәһирләшиңларни сораймән.
қени әмисә, әқил-параситимизни бу алмас билән қайтидин биләп, үмидимизни йеңилап, бу тарихий, ибрәтлик сәпәрни бирликтә башлайли!
унутмайли! бу дастанни биз тарих оқуш үчүн әмәс, тарих йаритиш үчүн оқуймиз!
әскәртиш: бу йеңи дастанимиз «түркистан таймз (вақти)» торида вақти вақтида елан қилиниду.
