хитайниң йолға қойған визисиз сайаһәт сийаситигә қаримай, рус сайаһәтчиләрниң паспортида түркийә тамғиси болғанлиқи үчүн қийинчилиққа учраватқанлиқи хәвәр қилинмақта.
рус сайаһәтчиләр 15-сентәбирдә йолға қойулған «хитайда 30 күн визисиз туруш» сийаситигә бақмай, чеградин өтүштә анда-санда мәсилигә дуч кәлмәктә. «Business FM» ниң хәвиридә көрситилишичә, паспортидики түркийәгә кириш-чиқиш тамғиси сәвәблик бир рус сайаһәтчиниң хитайға кириши рәт қилинған.
«TürkRus» ториниң хәвиригә асасланғанда, хитай даирилириниң бейҗиң билән әнқәрә оттурисидики җиддий мунасивәт түпәйлидин, болупму түркийәдә 28 күндин артуқ турған русийә пуқралирини илгириму чеградин қайтурувәткәнлики мәлум иди. бирақ, йеқинқи вәқәдә, сайаһәтчиниң түркийәдә қисқа муддәт турғанлиқиға қаримай, тамғидики чесланиң «хирә» икәнлики баһанә қилинған.
сайаһәтчилик саһәсиниң вәкиллири бу вәқәниң техи омумлашқан бир әһвал әмәсликини, шуңа вәһимигә чүшүшниң һаҗити йоқлуқини тәкитлимәктә.
«Go China» сайаһәт ширкитиниң игиси сергей седов, хитайниң визисиз түзүмгә өткинигә көп болмиғанлиқини, шуңа бу һәқтә йетәрлик истатистикилиқ мәлуматниң техи топланмиғанлиқини билдүрүп, өз херидарлири ичидә бундақ әһвалниң көрүлмигәнликини ипадилиди. седов мундақ дәп көрсәтти: «тәхминән һәр икки рус сайаһәтчиниң бириниң паспортида түркийә тамғиси бар. тамғиларниң ениқ оқуғили болмаслиқиму көп учрайдиған әһвал. шуңлашқа, мән бу вәқәни алаһидә бир әһвал дәп қараймән һәмдә кишиләрниң кәң көләмлик һалда чеградин қайтурулуши мумкин әмәс дәп ойлаймән».
лекин сайаһәт ширкәтлири түркийәдә узақ муддәт турғанларниң хитайға кириштә қийинчилиққа учришиниң йеңилиқ әмәсликини әскәртти. визисиз түзүм йолға қойулуштин илгириму хитай консулханилириниң, кишиләрниң түркийәдә турған вақтини испатлиши үчүн айропилан белити, айродурумда чүшкән сүрәт, һәтта шу күнниң чесласи йезилған гезитни көтүрүп чүшкән сүрәт қатарлиқ қошумчә материйалларни тәләп қилғанлиқи мәлум. мутәхәссисләр бу йеңи сийасәтниң әмәлийәттә қандақ йолға қойулидиғанлиқини көзитиш үчүн бир қанчә ай вақит кетидиғанлиқини, әмма омумйүзлүк чәкләш тәдбири қоллинилишини мөлчәрлимәйдиғанлиқини билдүрмәктә.
хәвәр мәнбәси:
Rus turistler Çin'e vizesiz girişte Türkiye damgasına takıldı
