истанбул, 2026-йили 13-ийул — дунйаниң һәр қайси җайлиридин кәлгән уйғур диний алимлири, өлималар вә зийалийларниң қатнишиши билән қурулған, түркийәниң истанбул шәһиригә җайлашқан шәрқий түркистан өлималар бирликиниң 12-қетимлиқ шура йиғини 12-ийул йәкшәнбә күни мувәппәқийәтлик ахирлашти.

мәзкур тәшкилатниң билдүрүшичә, тәшкилатниң 65 нәпәр әзаси иштирак қилған йиғининиң биринчи күнидә, өлималар бирликиниң өткән үч йил ичидә қилған хизмәтлири һәққидә омумий доклат берип өтүлди. 3 йиллиқ хизмәт доклатидин кейин, өткән үч йилдин бери бирликниң рәислик вәзиписини өтәп келиватқан д. алимҗан буғда башчилиқидики иҗраийә һәйити истипа бәрди. арқидин қурулған 3 кишилик сайлам комитетиниң башқурушида елип берилған сайламда, әң көп авазға еришкән д. алимҗан буғда тәкрар шәрқий түркистан өлималар бирликиниң рәисликигә сайланди.

йеңи рәһбәрлик һәйити вә бөлүмләрниң пиланлири

сайламдин кейин, бирлик рәиси, икки муавин рәис вә бөлүм мәсуллиридин тәшкилләнгән йеңи рәһбәрлик һәйити қуруп чиқилди. икки күнлүк йиғин җәрйанида пәтива, дәвәт вә иршад, ташқи вә ички алақә, тәрҗимә-тәтқиқат, хәлқ билән мунасивәт һәмдә малийә бөлүмлири айрим-айрим гуруппиларға бөлүнүп, хизмәт үнүмини техиму йуқири сәвийәгә көтүрүш мәсилисидә қизғин музакирә елип барди вә алдимиздики йилларда қилинидиған хизмәт пиланлирини бекитти.

кәлгүси хизмәт нишанлири

шәрқий түркистан өлималар бирликиниң байанатида билдүрүлүшичә, йиғинда бирликниң әһмийити, өлималар билән тәшкилатларниң мунасивити, шәрқий түркистан дәвасида вә җәмийәттә өлималарниң ойнайдиған роли қатарлиқ муһим мәсилиләр музакирә қилинған. йуқиридики музакириләргә асасән, өлималар бирлики алдимиздики йилда төвәндики 8 түрлүк хизмәтни ройапқа чиқириш қарарини алған:

• миллий вә диний кимликни қоғдаш: шәрқий түркистан хәлқиниң, болупму муһаҗирәттики хәлқниң етиқади, әхлақ-пәзиләтлири, миллий өрп-адәтлирини қоғдаш вә уйғур җәмийитиниң ислаһати үчүн техиму тиришчанлиқ көрситиш.

• хәлқаралиқ дәвәт хизмити: шәрқий түркистан дәвасини әрәб вә ислам дунйасида техиму җанландуруш үчүн йеңи тәшкилат вә дөләт әрбаблири билән алақә орнитиш.

• тәшкилатлар ара мунасивәт: түркийә ичи вә сиртидики барлиқ шәрқий түркистан тәшкилатлири һәмдә дәва үчүн актип хизмәт қиливатқан кишиләр билән болған мунасивәтни күчәйтиш.

• академик вә оқушлуқ хизмәтлири: хәлқниң диний еһтийаҗиға асасән тәтқиқатларни елип бериш, китаб-журнал вә үн-син буйумлирини тәййарлаш, өсмүрләр үчүн исламий оқушлуқларни түзүп чиқиш.

• оқуғучиларни қоллаш: илаһийәт саһәсидә оқуватқан уйғур оқуғучиларға қаритилған хизмәтләрни җанландуруш вә қәрәллик илмий муһакимә йиғинлирини давамлаштуруш.

• пәтива хизмәтлири: өлималар бирлики пәтива бөлүминиң нөвәттики хизмәтлирини техиму җанландуруп илгири сүрүш.

• йашлар вә идийви хизмәт: йашларниң һәр хил батил пикир вә еқимларға майил болуп кетишиниң алдини елиш үчүн, уларға мас келидиған дәвәт вә тәшвиқат хизмәтлирини күчәйтиш.

• хәлқ билән болған алақә: хәлқ билән мунасивәт бөлүминиң хизмитини техиму системилиқ һаләткә кәлтүрүп, амма билән болған риштини чиңитиш.

байанатниң ахирида, бирлик рәһбәрлики кәлгүсидики хизмәтләрниң утуқлуқ болушини тиләп, хәлқ үчүн техиму көп хизмәтләрни ройапқа чиқиришқа мувәппәқ болуш үчүн дуа вә йахши тиләкләр билән йиғинни хуласилигән.