2026-йили 10-сентәбир | «уйғурларни қутқузуш» һәрикити

түркистан таймз тәрҗимиси

«һәммәйләнгә адаләт» тәшкилатиниң «уйғурларни қутқузуш» һәрикити хитай компартийәсиниң баш секретари ши җинпиңниң 2026-йили 24-сентәбирдә башлинидиған вашингтондики дөләт ишлири зийаритини қаттиқ әйибләйду. давамлишиватқан уйғур ирқий қирғинчилиқиниң асаслиқ пиланлиғучисини толуқ дипломатик шәрәп мурасим билән күтүвелиш инсанийәткә қарши җинайәтләрни нормаллаштуриду, қисқа муддәтлик иқтисадий мәнпәәтни қанунда бәлгиләнгән кишилик һоқуқ мәҗбурийәтлиридин үстүн қойиду.

бу дөләт ишлири зийарити американиң рәсмий бекитмилири вә икки партийә ортақ қоллайдиған сийасий вәдилиригә биваситә зит. америка ташқи ишлар министирлиқи ши җинпиң һакимийитидики хитай түзүминиң ишғал астидики шәрқий түркистанда уйғурлар вә башқа түркий мусулман хәлқләргә қарши ирқий қирғинчилиқ вә инсанийәткә қарши җинайәтләрни давамлиқ садир қиливатқанлиқини рәсмий етирап қилған. бу бекитмә тунҗи қетим 2021-йили чиқирилған вә кейинки америка һөкүмәтлири тәрипидин сақлап қилинған. байанатта йәнә, америка кеңәш палатасиниң 2026-йили 16-ийун 444-номурлуқ кеңәш палатаси қарарини (S.Res. 444) бирдәк мақуллиғанлиқи; қарарда ши җинпиңниң алдамчилиқ қилиш, тинчлиқ вә бихәтәрликкә зийан йәткүзүш һәмдә «бүгүнки дәврдики дәһшәтлик ирқий қирғинчилиқ»ни пиланлаш сәвәбидин мустәбит, дәп әйибләнгәнлики билдүрүлди.

«уйғурларни қутқузуш» һәрикити йәнә, болупму аз учрайдиған йәр елементлири, литий вә гирафитқа мунасивәтлик икки тәрәплик байлиқ йаки сода келишимлири тоғрисида сөһбәтлишишниң «уйғур мәҗбурий әмгикиниң алдини елиш қануни»ниң (UFLPA) пүтүнликигә тәһдит селиватқанлиқини агаһландурди. американиң дөләт қоллайдиған мәҗбурий әмгәккә шерик болуп қелишиниң алдини елиш үчүн чиқирилған бу қанун, шәрқий түркистанда қезивелинған, ишләпчиқирилған йаки йасалған барлиқ маллар дөләт йетәкчиликидики мәҗбурий әмгәккә четишлиқ, дәп қарилидиған, әмма қарши дәлил билән рәт қилғили болидиған қаттиқ қануний пәрәзни бәлгиләйду; шуңа бу малларниң америкаға кириши чәклиниду.

«уйғурларни қутқузуш» һәрикитиниң гуруппа башлиқи арслан һидайәт мундақ деди: «уйғурларға қаритилған системилиқ зийанкәшлик тарихта қелип кәткән иш әмәс; у һазирму давамлишиватқан, әмәлий ирқий қирғинчилиқтур. милйонлиған қериндашлиримиз йуқири бихәтәрликлик түрмиләрдә йәнила азаб чәкмәктә; улар мәҗбурий әмгәк, қийнаш вә мәдәнийәтни йоқитишқа дуч кәлмәктә. кеңәш палатасиниң 444-номурлуқ қарарда вәтинимизни шәрқий түркистан, дәп ениқ етирап қилиши кимликимизниң күчлүк дәлиллиниши болди. ақсарайниң әмди бу дәһшәтләргә мәсул мустәбитни күтүвалғанлиқини көрүш адәмни қаттиқ азаблайдиған хийанәттур. кишилик һоқуқ мәсулийитини сүрүштүрүш болмиған һәр бир иқтисадий келишим әхлақий дағдур».

«һәммәйләнгә адаләт» тәшкилатиниң «уйғурларни қутқузуш» һәрикити америка рәһбәрлирини «уйғур мәҗбурий әмгикиниң алдини елиш қануни»ни һечқандақ мустәсналиқсиз иҗра қилиш, шерик болған хитай компартийәси әмәлдарлириға «дунйави магнитский қануни» бойичә нишанлиқ җаза тәдбирлирини йүргүзүш вә кишилик һоқуқни иқтисадий йол қойуштин үстүн қойуш арқилиқ кишилик һоқуқ мәсулийитини дәрһал қоғдашқа чақирди.

мәнбә:

Justice For All. “Justice For All’s Save Uyghur Campaign Condemns Upcoming White House State Visit of Xi Jinping.” September 10, 2026.