2025-يىلى 31-مارت، تاجىكىستان، قىرغىزىستان ۋە ئۆزبېكىستان پرېزىدېنتلىرى خۇجەندكە يىغىلىپ، ئۈچ دۆلەت چېگراسىنى ئايرىش ۋە رەسمىي دوستلۇق خىتابنامىسى ئورنىتىش توغرىسىدا كېلىشىم ئىمزالىدى. بۇ ئىلگىرىلەش ئىلگىرى تاجىكىستان بىلەن قىرغىزىستان ئوتتۇرىسىدا ئۇزۇندىن بۇيان داۋاملىشىپ كېلىۋاتقان تېررىتورىيە توقۇنۇشىنى ھەل قىلغان چېگرا شەرتنامىسىنى ئۆز ئىچىگە ئالغان ھەل قىلىش ئۇرۇنۇشلىرىدىن كېيىن ئوتتۇرىغا چىقتى. بۇ كېلىشىم رايون ھەمكارلىقىنى كۈچەيتىپ، مۇقىمسىزلىقنى كەلتۈرۈپ چىقارغان تارىخىي نارازىلىقلارنى ھەل قىلىشنى مەقسەت قىلىدىكەن.
ئىگىلىنىشىچە، 31-مارت تاجىكىستاننىڭ خوجەند شەھىرىدە قىرغىزىستان پىرېزىدېنتى سادىر جاپاروف، تاجىكىستان پىرېزىدېنتى ئىمومالى راھمان ۋە ئۆزبېكىستان پىرېزىدېنتى شەۋكەت مىرزىيويوفنىڭ ئىشتىراك قىلىشى بىلەن ئۆتكۈزۈلگەن يىغىندىن كېيىن، ئۈچ تەرەپ چېگرا مەسىلىسى ھەققىدىكى كېلىشىمگە ئىمزا قويغان.
خۇجەند خىتابنامىسى چېگرا مەسىلىسىدە كېلىشىم ھاسىل قىلىش بىلەن بىرگە، رايون ھەمكارلىقى ۋە مۇقىملىقىنىڭ سىمۋولى دەپ قارالدى. بۇ ھەقتىكى باياناتتا ئۈچ تەرەپلىك كېلىشىمنىڭ، شۇنداقلا قىرغىزىستان بىلەن تاجىكىستان ئوتتۇرىسىدىكى دۆلەت چېگراسى كېلىشىمىنىڭ مۇقىملىق ۋە ئىزچىللاشقان تەرەققىيات نىشانلىرىنى كاپالەتكە ئىگە قىلىش، پۈتۈن رايوننىڭ خەلقئارادىكى ئابرۇيىنى زورايتىش مەقسىتىگە خىزمەت قىلىدىغانلىقى ۋە شۇنداقلا قېرىنداش دۆلەتلەرنىڭ قوشنىدارچىلىق، ئىشەنچ ۋە ئىستراتېگىيەلىك ھەمكارلىق مۇناسىۋىتىنىڭ كۈچىيىشىنىڭ يېڭى بەلگىسى بولىدىغانلىقى قەيت قىلىنغان.
بۇ كېلىشىمنىڭ ئىمزالىنىشى قىرغىزىستان ۋە تاجىكىستان پىرېزىدېنتلىرىنىڭ 13-مارت دۆلەت چېگراسى توغرىسىدا كېلىشىم ئىمزالىشىدىن ئىككى ھەپتىدىن كۆپرەك ۋاقىت ئۆتكەندىن كېيىن روياپقا چىققان. بۇ كېلىشىم ئىككى ئوتتۇرا ئاسىيا دۆلىتى ئوتتۇرىسىدىكى ئۇزۇن مۇددەتتىن بۇيان داۋاملىشىپ كەلگەن ۋە يېقىنقى يىللاردا توقۇنۇش مەنبەسى بولۇپ كەلگەن نىزانى ھەل قىلدى، دەپ قارالماقتا.
ئوتتۇرا ئاسىيا دۆلەتلىرى سوۋېت ئىتتىپاقى پارچىلانغاندىن بۇيان چېگرا ماجىراسىغا دۇچ كەلدى. داۋاملىشىۋاتقان زېمىن ماجىرالىرى ئارىلاپ توقۇنۇشنى كەلتۈرۈپ چىقاردى. مۇتەخەسىسلەرنىڭ قارىشىچە، يېڭى كېلىشىم ئالاقىدار دۆلەتلەر ئۈچۈن دىپلوماتىك غەلبىگە ۋەكىللىك قىلىدۇ ھەمدە ئۆزگىرىۋاتقان دۇنيا ۋەزىيىتىدە رايوننى مۇقىملاشتۇرۇش ئۈچۈن تېخىمۇ كەڭ تىرىشچانلىقلارنى كۆرسىتىدۇ.
2025-يىلى 3-ئاپرىل
