تۈركىيەنىڭ ھەرقايسى جايلىرىدا، غەززەدىكى زۇلۇمغا ۋە شەرقىي تۈركىستاندىكى كىشىلىك ھوقۇق دەپسەندىچىلىكلىرىگە قارشى ھېسداشلىق بىلدۈرۈش ھەمدە قوللاش مەقسىتىدە بىر قاتار پائالىيەتلەر ئۆتكۈزۈلدى. خەير-ساخاۋەت بازارلىرى ۋە نارازىلىق نامايىشلىرى قاتارلىق كۆپ خىل پائالىيەتلەر كەڭ كۆلەمدە ئۇيۇشتۇرۇلۇپ، ئاھالىلەرنىڭ كۈچلۈك قوللىشىغا ئېرىشتى.
غازىئانتەپ قارقامىشتا: غەززە ۋە شەرقىي تۈركىستان ئۈچۈن خەير-ساخاۋەت بازىرى ئېچىلدى
ئىخلاس خەۋەر ئاگېنتلىقى (ئى ھ ئا) نىڭ ئۇچۇرىغا ئاساسلانغاندا، غازىئانتەپنىڭ قارقامىش ناھىيەسىدە 2025-يىلى 7-ماي چارشەنبە كۈنى غەززە ۋە شەرقىي تۈركىستانغا مەدەت بېرىش ئۈچۈن خەير-ساخاۋەت بازىرى ئېچىلدى. «بەشنى ئېكسپرېس» گېزىتىنىڭ خەۋىرىدە، بۇ پائالىيەتنىڭ ھېسداشلىق ۋە ئىتتىپاقلىق روھىنى ئۇرغۇتۇش مەقسىتىدە ئۆتكۈزۈلگەنلىكى، بازاردا ھەر خىل كاۋاپلار، ئەنئەنىۋى تاتلىق-تۈرۈملەر ۋە ئائىلىدە تەييارلانغان يېمەك-ئىچمەكلەرنىڭ سېتىلغانلىقى قەيت قىلىنغان. بازار ئاھالىلەرنىڭ زور قىزىقىشىنى قوزغىغان بولۇپ، توپلانغان بارلىق كىرىمنىڭ غەززە ۋە شەرقىي تۈركىستاندىكى ئېھتىياجلىق كىشىلەرگە ئىئانە قىلىنىدىغانلىقى جاكارلاندى. پائالىيەت تەشكىللىگۈچىلىرى قاتناشقۇچىلارنىڭ قىزغىن قوللىغانلىقىدىن خۇرسەن بولغانلىقىنى ئىپادىلەپ، تۆھپە قوشقان ھەممەيلەنگە مىننەتدارلىقىنى بىلدۈردى.
يوزغاتتا: ئوقۇغۇچىلار زۇلۇمغا قارشى نامايىش ئۆتكۈزدى
«مىللىيەت» گېزىتىنىڭ خەۋىرىگە قارىغاندا، يوزغات بوزوك ئۇنىۋېرسىتېتىنىڭ ئوقۇغۇچىلىرى 2025-يىلى 7-ماي چارشەنبە كۈنى غەززەدىكى ئىسرائىلىيە تاجاۋۇزچىلىقىغا ۋە شەرقىي تۈركىستاندىكى كىشىلىك ھوقۇق دەپسەندىچىلىكىگە نارازىلىق بىلدۈرۈش ئۈچۈن نامايىش ئۆتكۈزدى. يوزغات ياش ئىنسان ھەق ۋە ھۈررىيەتلىرى ئىنسانپەرۋەرلىك ياردەم ۋەخپى (İHH) ۋە پۇسۇلا ياشلار ئۇيۇشمىسى تەرىپىدىن ئۇيۇشتۇرۇلغان بۇ پائالىيەت، ئۇنىۋېرسىتېتنىڭ مەركىزىي ئاشخانا بىناسى ئالدىدىن باشلىنىپ، ئەردوغان ئاقداغ قۇرۇلتاي ۋە مەدەنىيەت مەركىزىدە ئاخىرلاشتى. ئوقۇغۇچىلار پەلەستىن ۋە شەرقىي تۈركىستان بايراقلىرىنى كۆتۈرۈپ، «زۇلۇمغا قارشى بىرلىشىمىز!» دېگەندەك لوزۇنكىلارنى توۋلاپ، ئىتتىپاقلىق ساداسىنى ياڭراتتى. پۇسۇلا ياشلار ئۇيۇشمىسىنىڭ رەئىسى رامازان ئەلى ئاقىن: «زۇلۇمغا قارشى تۇرۇش – ئىنسانىي بۇرچىمىزدۇر» دېگەنلەرنى تەكىتلىدى.
قارابۈكتە: بالىلار غەززە ۋە شەرقىي تۈركىستاننى قوللاپ مەنىلىك پائالىيەت ئۆتكۈزدى
«يېڭى شەپەق» گېزىتىنىڭ خەۋىرىدە بىلدۈرۈلۈشىچە، قارابۈكتە ئىنسان ھەق ۋە ھۈررىيەتلىرى (İHH) ئىنسانپەرۋەرلىك ياردەم ۋەخپى قارابۈك شۆبىسىنىڭ تەشكىللىشى بىلەن، 2025-يىلى 3-ماي شەنبە كۈنى بالىلار غەززەدىكى ئىسرائىلىيە ھۇجۇملىرىغا نارازىلىق بىلدۈرۈش ۋە شەرقىي تۈركىستانغا ھېسداشلىق قىلىش ئۈچۈن نامايىش قىلغان. يېڭىشەھەر جامەسى ئالدىدىن باشلانغان نامايىش كامال گۈنەش كوچىسىدا ئاخىرلاشقان. نامايىشقا قاتناشقان بالىلار تۈركىيە ۋە پەلەستىن بايراقلىرىنى ھەمدە «شەرقىي تۈركىستانغا ئەركىنلىك!»، «غەززە يالغۇز ئەمەس!» دېگەندەك شوئارلار يېزىلغان تاختىلارنى كۆتۈرۈۋالغان. İHH قارابۈك شۆبىسى بالىلار گۇرۇپپىسىنىڭ ئەزاسى ئەمىر باير ئۇرۇش ۋە ۋەھىمە ئىچىدە ياشاۋاتقان بالىلارنىڭ ئېچىنىشلىق ئەھۋالىغا كۆڭۈل بۆلۈشنى مۇراجىئەت قىلىپ بايانات ئېلان قىلغان. نامايىش «قولۇمنى تۇت قۇددۇس» ناملىق شېئىر ۋە «لېۋې پەلەستىنا» (Leve Palestina) ناخشىسىغا تەڭكەش قىلىنغان ئەركىنلىك ئۇسسۇلى بىلەن ئاخىرلاشتى.
بۇ پائالىيەتلەر تۈركىيەنىڭ ھەرقايسى شەھەرلىرىدە غەززە ۋە شەرقىي تۈركىستان خەلقى بىلەن بولغان قېرىنداشلىق ۋە ھېسداشلىق رىشتىنى يەنىمۇ مۇستەھكەملەپ، تۈركىيە خەلقىنىڭ زۇلۇمغا قارشى بىر سەپتە ئىكەنلىكىنى يەنە بىر قېتىم نامايان قىلدى.
