تۈركىستان تايمىز – ئوتتاۋا: كانادادىكى كىشىلىك ھوقۇق تەشكىلاتلىرى ھۆكۈمەتنى ئۇيغۇرلارنىڭ مەجبۇرىي ئەمگىكى ئارقىلىق ئىشلەپچىقىرىلغان مەھسۇلاتلارنىڭ دۆلەتكە كىرىشىنى توسۇش ئۈچۈن چېگرا كونتروللۇقىنى كۈچەيتىشكە ۋە بۇ ساھەگە تېخىمۇ كۆپ مەبلەغ سېلىشقا جىددىي دەۋەت قىلماقتا.
«ئۇيغۇر ھەقلىرىنى قوغداش تەشكىلاتى» (URAP) يېقىندا ئېلان قىلىنىدىغان دۆلەت خامچوتىدا كانادا چېگرا مۇلازىمەت ئىدارىسىنىڭ ئىقتىدارىنى ئاشۇرۇش ئۈچۈن مەخسۇس مەبلەغ ئاجرىتىلىشىنى ئۈمىد قىلىدىغانلىقىنى بىلدۈردى. تەشكىلاتنىڭ سىياسەت دېرىكتورى جاسمىن كەينتنىڭ ئېيتىشىچە، چېگرا خادىملىرىنى مۇرەككەپ تەمىنلەش زەنجىرلىرىنى پەرقلەندۈرۈش بويىچە تەربىيەلەش ئارقىلىق قايسى مەھسۇلاتنىڭ مەجبۇرىي ئەمگەك بىلەن مۇناسىۋەتلىك ئىكەنلىكىنى ئېنىقلاش ئاسانلىشىدۇ.
دوكلاتتا كۆرسىتىلىشچە، كانادا بازارلىرىدا، بولۇپمۇ مونترېئالدىكى ئاسىيا تاللا بازارلىرىدا شەرقىي تۈركىستاندىن كەلگەن قىزىل چىلان قاتارلىق مەھسۇلاتلارنى ئاسانلا ئۇچراتقىلى بولىدۇ. جاسمىن كەينت، شەرقىي تۈركىستاندىن كەلگەن، بولۇپمۇ پاختا، پەمىدۇر ۋە ئاز ئۇچرايدىغان مېتاللار ئىشلىتىلگەن مەھسۇلاتلارنىڭ ھەممىسى دېگۈدەك مەجبۇرىي ئەمگەكنىڭ نەتىجىسى ئىكەنلىكىنى تەكىتلىدى. ئۇ يەنە تەمىنلەش زەنجىرىنىڭ مۇرەككەپلىكى، يەنى بىر مەھسۇلاتنىڭ خام ئەشياسى شەرقىي تۈركىستاندىن كېلىپ، تايلاندتا قۇراشتۇرۇلۇپ، ئاندىن كاناداغا كىرىشى مۇمكىنلىكىنى، بۇنىڭ مەھسۇلاتنىڭ ئەسلى مەنبەسىنى ئىز قوغلاشنى قىيىنلاشتۇرىدىغانلىقىنى قوشۇپ ئۆتتى.
بۇ مەسىلىگە قارىتا، كۋېبېكلىقلار بىلوكى پارتىيەسى يېڭى بىر قانۇن لايىھەسىنى ئوتتۇرىغا قويۇپ، «ئىسپاتلاش مەجبۇرىيىتىنى ئۆرۈۋېتىش»نى تەلەپ قىلدى. بۇ لايىھەگە ئاساسەن، ئىمپورت قىلغۇچىلار ئۆز مەھسۇلاتلىرىنىڭ مەجبۇرىي ئەمگەك ئارقىلىق ئىشلەپچىقىرىلمىغانلىقىنى ئىسپاتلاشقا مەجبۇر بولىدۇ. بۇ ئامېرىكىنىڭ يولغا قويغان سىياسىتىگە ئوخشىشىپ كېتىدۇ.
شىربۇرۇك ئۇنىۋېرسىتېتىنىڭ خىتاي ئىشلىرى مۇتەخەسسىسى سېرژ گرانگېر، كانادا ھۆكۈمىتىنىڭ ئۇيغۇرلارنىڭ كىشىلىك ھوقۇق مەسىلىسىنى دائىم تىلغا ئالغان بولسىمۇ، ئەمەلىي ھەرىكىتىنىڭ يېتەرسىز ئىكەنلىكىنى، ئەگەر ھۆكۈمەت سۆزى بىلەن ھەرىكىتىنى بىردەك قىلماقچى بولسا، بۇ مەھسۇلاتلارنى پۈتۈنلەي چەكلىشى كېرەكلىكىنى ئوتتۇرىغا قويدى.
