2025-يىلى 26-دېكابىر
«ھەممە ئۈچۈن ئادالەت» (Justice For All) تەشكىلاتىنىڭ «ئۇيغۇرلارنى قۇتقۇزايلى» سەپەرۋەرلىك ھەرىكىتى، ئامېرىكا دۆلەت مەجلىسى خىتاي ئىشلىرى ئىجرائىيە كومىتېتى (CECC) ئېلان قىلغان يېڭى بايقاشلارغا ئالاھىدە دىققەت تارتتى. CECC نىڭ 2025-يىللىق دوكلاتىدا تەپسىلىي بايان قىلىنغىنىدەك، مەزكۇر بايقاشلار خىتاي ئىشغالىيىتى ئاستىدىكى شەرقىي تۈركىستاندا ئۇيغۇرلار ۋە باشقا تۈركىي مىللەتلەرگە قارشى جىنايەتلەرنىڭ ھېلىھەم داۋاملىشىۋاتقانلىقىنى پاكىتلار بىلەن خاتىرىلىگەن.
CECC نىڭ دوكلاتىدا كۆرسىتىلىشىچە، خىتاي دائىرىلىرى ئامېرىكا ھۆكۈمەت ئورگانلىرى تەرىپىدىن ئىلگىرى «ئىنسانىيەتكە قارشى جىنايەت» ۋە «ئىرقىي قىرغىنچىلىق» دەپ بېكىتىلگەن سىياسەتلەرنى داۋاملاشتۇرماقتا. ئەڭ يېڭى دوكلات مەزگىلىدىكى دەلىللەر بۇ قىلمىشلارنىڭ توختاپ قالماستىن، ئەكسىچە داۋاملىشىۋاتقانلىقىنى ئىسپاتلىدى. بۇ قىلمىشلار كېڭەيتىلگەن كەڭ كۆلەملىك نازارەت قىلىش، خالىغانچە تۇتقۇن قىلىش، نوپۇسنى مەجبۇرىي تىزگىنلەش تەدبىرلىرى ۋە دىنىي پائالىيەتلەرگە قارىتىلغان تېخىمۇ قاتتىق چەكلىمىلەرنى ئۆز ئىچىگە ئالىدۇ. دوكلاتتا يەنە، ئۇيغۇر دېھقانلىرىنى يەر-ماكانلىرىدىن كۆچۈرۈۋېتىش ۋە ئۇلارنىڭ يەرلىرىنى دۆلەت كونتروللۇقىدىكى ئورۇنلارغا ئۆتكۈزۈپ بېرىش قاتارلىق يېڭى ۋە كېڭەيتىلگەن مەجبۇرىي ئەمگەك ئادەتلىرى ئالاھىدە تىلغا ئېلىنغان بولۇپ، بۇ ئەھۋال يەرشارى تەمىنلەش زەنجىرىگە مەجبۇرىي ئەمگەكنىڭ سىڭىپ كىرىشىگە ئائىت يېڭى ئەندىشىلەرنى قوزغىدى. بۇنىڭدىن باشقا، CECC ئۇيغۇر پاناھلىق تىلىگۈچىلەرنىڭ ئۈچىنچى دۆلەتلەردىن مەجبۇرىي قايتۇرۇپ كېلىنىشى ۋە چەت ئەلدىكى ئۇيغۇرلارنىڭ داۋاملىق نىشانغا ئېلىنىشى قاتارلىق چېگرا ھالقىغان باستۇرۇشنىڭ يېقىنقى مىساللىرىنىمۇ خاتىرىلەپ، خىتاي زۇلۇمىنىڭ چېگراسىدىن ھالقىپ كەتكەنلىكىنى ئاشكارىلىدى.
«ئۇيغۇرنى قۇتقۇزايلى» گۇرۇپپىسىنىڭ يېتەكچىسى ئارسلان ھىدايەت بۇ ھەقتە توختىلىپ: «بۇ بايقاشلار، ئۇيغۇرلار دۇچ كېلىۋاتقان ۋەھشىيلىكلەرنىڭ ئۆتمۈشكە ئايلانمىغانلىقىنى ئېنىق كۆرسىتىپ بەردى» دېدى. ئۇ سۆزىنى داۋاملاشتۇرۇپ: «CECC نىڭ ئەڭ يېڭى دوكلاتى نۆۋەتتىكى دەپسەندىچىلىكلەر ۋە يېڭى باستۇرۇش دېلولىرىنى ھۆججەتلەشتۈرگەن بولۇپ، بۇ ئەھۋال جاۋابكارلىقنى سۈرۈشتۈرۈش ۋە ئەھمىيەتلىك خەلقئارالىق ھەرىكەت قوللىنىشنىڭ ناھايىتى زۆرۈرلۈكىنى تەكىتلىمەكتە» دېگەنلەرنى سۆزلىرىگە ئىلاۋە قىلدى.
«ھەممە ئۈچۈن ئادالەت» تەشكىلاتىنىڭ رەئىسى ئىمام مۇجاھىد: «بۇ دوكلات ئۇيغۇرلارغا قارىتىلغان ۋەھشىيلىكلەرنىڭ تېخى يېپىلمىغان بىر سەھىپە ئىكەنلىكىنى، يەنى زۇلۇمنىڭ ھازىرمۇ داۋاملىشىۋاتقانلىقىنى ئېنىق ئوتتۇرىغا قويدى» دېدى. ئۇ يەنە: «خەلقئارا جەمئىيەت قۇرۇق ئەندىشە باياناتلىرىدىن ھالقىپ، جىنايەتچىلەرنىڭ جاۋابكارلىقىنى سۈرۈشتۈرۈش، ئاجىز ئۇيغۇر مەھەللىلىرىنى قوغداش ۋە ھېچقانداق ھۆكۈمەت ياكى شىركەتنىڭ بۇ جىنايەتلەرگە شېرىك بولماسلىقىغا كاپالەتلىك قىلىش ئۈچۈن ئەمەلىي ھەرىكەت قوللىنىشى كېرەك» دەپ تەكىتلىدى.
«ھەممە ئۈچۈن ئادالەت» تەشكىلاتىنىڭ «ئۇيغۇرنى قۇتقۇزايلى» ھەرىكىتى، ئامېرىكا ھۆكۈمىتى، خەلقئارالىق شېرىكلەر ۋە ئالاقىدار ئورگانلارنى CECC نىڭ بايقاشلىرىغا ئاساسەن ھەرىكەت قىلىشقا چاقىردى. بۇ ھەرىكەتلەر؛ مەجبۇرىي ئەمگەكنى چەكلەش ئىجراسىنى كۈچەيتىش، جاۋابكار ئەمەلدارلارنى سۈرۈشتۈرۈش تەدبىرلىرىنى كېڭەيتىش، ئۇيغۇر مۇساپىرلىرى ۋە پاناھلىق تىلىگۈچىلەرنى قوغداش، شۇنداقلا ھېچقانداق تەمىنلەش زەنجىرىنىڭ داۋاملىشىۋاتقان جىنايەتلەر بىلەن باغلىنىپ قالماسلىقىغا كاپالەتلىك قىلىش قاتارلىقلارنى ئۆز ئىچىگە ئالىدۇ.
