تۈركىستان ۋاقت تورى، 2026-يىلى 10-فېۋرال، 2026-يىلى 8-فېۋرال ياپونىيەدە ئۆتكۈزۈلگەن ئاۋام پالاتاسى سايلىمىدا، ھاكىمىيەت بېشىدىكى لىبېرال دېموكراتلار پارتىيەسى (LDP) مۇتلەق ئۈستۈنلۈك بىلەن تارىخىي غەلىبىنى قولغا كەلتۈردى. بۇ قېتىملىق سايلامدا ئەڭ دىققەتنى تارتقان نۇقتىلارنىڭ بىرى، ياش ئۇيغۇر سىياسىئون ئارفىيە ئېرىنىڭ (ئەرفىيە ئابلەت) چىبا 5-رايونىدىن ئۈچىنچى قېتىم ئاۋام پالاتا ئەزاسى بولۇپ سايلىنىشى بولدى.

ياپونىيە خەۋەر مەنبەلىرىنىڭ بىلدۈرۈشىچە، باش ۋەزىر سانائې تاكائىچى (Sanae Takaichi) رەھبەرلىكىدىكى لىبېرال دېموكراتلار پارتىيەسى ئاۋام پالاتاسىدىكى 465 ئورۇندىن 316 سىگە ئېرىشكەن. ئەگەر ئۇلارنىڭ ئىتتىپاقدىشى بولغان ياپونىيە يېڭىلىق پارتىيەسىنىڭ ئورۇنلىرىنى قوشقاندا، بۇ سىياسىي ئىتتىپاق جەمئىي 352 ئورۇننى ئىگىلەپ، پارلامېنتتا مۇتلەق سۆز ھوقۇقىنى قولغا كەلتۈرگەن. بۇ نەتىجە مەزكۇر پارتىيەنىڭ 1955-يىلىدىن بۇيانقى ئەڭ يۇقىرى غەلىبىسى ھېسابلىنىدۇ.

بۇ غەلىبە سانائې تاكائىچى ھۆكۈمىتىنىڭ دۆلەت مۇداپىئەسىنى كۈچەيتىش، ئىقتىسادىي ئىسلاھات ۋە بولۇپمۇ خىتايغا قارىتا تۇتقان قاتتىق قول، باش ئەگمەس پوزىتسىيەسىنىڭ ياپونىيە خەلقى تەرىپىدىن زور كۈچ بىلەن قوللانغانلىقىنىڭ ئىسپاتى دەپ قارالماقتا.

دۇنيا ئۇيغۇر قۇرۇلتىيىنىڭ تەبرىك باياناتىدا تىلغا ئېلىنغىنىدەك، يېڭى باش ۋەزىر سانائې تاكائىچى ئۇيغۇر مەسىلىسىگە نىسبەتەن ناتونۇش شەخس ئەمەس. ئۇ ئۇزۇن يىللاردىن بېرى «ياپونىيە پارلامېنتى ئۇيغۇر دوستلۇق گۇرۇپپىسى» نىڭ مۇئاۋىن رەئىسى بولۇپ كەلگەن. تاكائىچى خانىم ئۇيغۇر تەشكىلاتلىرىنىڭ ۋەكىللىرى بىلەن كۆپ قېتىم كۆرۈشكەن ھەمدە ئۇيغۇرلارنىڭ كىشىلىك ھوقۇقىنى قوغداش ساھەسىدە ئىزچىل قوللاپ كەلگەن سىياسەتچىدۇر.

ياپونىيە سىياسىي سەھنىسىدە چاقناۋاتقان ئەرفىيە ئېرى، گەرچە سايلام جەريانىدا ھاۋا رايى تۇراقسىز بولۇپ، قاتتىق قار يېغىپ تۇرغان بولسىمۇ، سايلىغۇچىلارنىڭ يۇقىرى باھاسى ۋە ئىشەنچىسى بىلەن قايتا سايلاندى. ئۇ بۇنىڭدىن ئىلگىرى 2023 ۋە 2024-يىللىرىدىكى سايلاملاردىمۇ غەلىبە قىلغان بولۇپ، نۆۋەتتە تاشقى ئىشلار مىنىستىرلىكىنىڭ مۇئاۋىن مىنىستىرى سۈپىتىدە مۇھىم ۋەزىپە ئۆتىمەكتە.

ئەرفىيەنىڭ تەرجىمىھالىغا نەزەر سالساق، ئۇنىڭ نېمە ئۈچۈن قىسقا ۋاقىت ئىچىدە بۇنچە زور ئىشەنچكە ئېرىشكەنلىكىنى كۆرۈۋالالايمىز:

• بىلىم قۇرۇلمىسى: جورج تاۋن ئۇنىۋېرسىتېتىنى تاماملىغان، يەتتە خىل تىلنى پۇختا بىلىدۇ.

• خەلقئارا تەجرىبە: ياپونىيە بانكىسى، دۇنيا بانكىسى ۋە بىرلەشكەن دۆلەتلەر تەشكىلاتى قاتارلىق خەلقئارالىق ئورۇنلاردا خىزمەت قىلغان.

• سىياسىي پوزىتسىيەسى: ئۇ ياپونىيەنىڭ مۇداپىئە ئىقتىدارىنى كۈچەيتىش بىلەن بىرگە، كىشىلىك ھوقۇق دىپلوماتىيەسىنى ئالدىنقى ئورۇنغا قويۇپ، خىتاينىڭ ئۇيغۇرلارغا يۈرگۈزۈۋاتقان سىياسەتلىرىگە قارىتا ئەمەلىي ھەرىكەت قوللىنىشنى تەكىتلەپ كەلمەكتە.

ئەرفىيە ئېرىنىڭ قايتا سايلىنىشى ۋە لىبېرال دېموكراتلار پارتىيەسىنىڭ غەلىبىسى، ياپونىيەنىڭ كەلگۈسى تاشقى سىياسىتىدە كىشىلىك ھوقۇق ۋە رايون بىخەتەرلىكىنىڭ تېخىمۇ مۇھىم ئورۇنغا قويۇلىدىغانلىقىدىن بېشارەت بەرمەكتە. بۇ سىياسىي ئۆزگىرىش، بولۇپمۇ ئۇيغۇر مەسىلىسىنىڭ خەلقئارا سەھنىدە تېخىمۇ كۈچلۈك ئاڭلىتىلىشى ئۈچۈن يېڭى بىر پۇرسەت دەپ قارالماقتا.